Millət vəkili Naqif Həmzəyev Gəncəyə atılan raketlər nəticəsində dağıdılan Qələbə parkı ətrafında memorial abidə ucadılması barəsində danışıb. Bu barədə ARB24 kanalının "İş vaxtı" verilişində açıqlama verən millət vəkili:
"Gəncəyə çoxlu sayda uzaq mənzilli raketlər atıldı. Şəhərin bir neçə hissəsində dağıntılar var. Ancaq Qələbə parkı ətrafında, oktyabrın 11-də gecə yarısda atılan raket nəticəsində dağılan ərazinin memorial muzey və abidə kompleksi olaraq tikilməsi, qurulması və saxlanılması planlaşdırılıbdı. Artıq parkın bir hissəsində müəyyən təmir işləri həyata keçirilibdi, ancaq digər hissələrində layihələndirmə işləri demək olar ki, yekunlaşdırılıbdı.
Hələlik orada böyük bir lövhə vurulubdu. Orada bütün Gəncə terrorunda şəhid olmuş bizim soydaşlarımızın rəsmləri öz əksini tapır.
İlk gündən ora çox böyük diqqət və axın oldu. Hal hazırda həmin evlərdə yaşamış uşaqların oyuncaqları, hansısa dərs ləvazimatları və ya əşyaları orda durur. Mütəmadi olaraq hərkəs ziyarətə gəlir, gül dəstələri ora qoyulur və tək yerli deyil, xarici qonaqlar da, jurnalistlər, deputatlar, rəsmilər mütləq həmin yeri ziyarət edirlər. Ora gələn insana hər hansısa təqdimat etməyə ehtiyac da qalmır, çünki mənzərədən insan vahiməyə düşür. İnsan inana bilmir ki, bu qədər binaların içərisində belə bir dağıntı var.
Həmin hissə qorunub saxlanılacaq və orada xüsusi bir abidə qoyulacaq ki, hər bir Gəncəyə gələn qonaq necəki bu gün mütləq Nizami Gəncəvinin məqbərəsini ziyarət edir, ikinci, üçüncü yerlərdən biri də bu yer olacaq. Biz erməni vandalizmini, erməni terrorunu, ermənilərin bizə qarşı törətdiyi bu hərbi cinayətləri mütləq dünyaya nümayiş etdirməliyik ki, heçkəs ermənilərin kim olduqlarını, hansı cinayətlər etdiklərini unutmasınlar. Çünki, bəlkə də bir müddət sonra ermənilərə sübut etmək olmayacaq belə bir cinayət törətdiklərini.
Ona görə də biz bunları fakt olaraq qoruyub saxlamalıyıq." deyə bildirib.