“Bu gün Gəncə terrorunun ildönümüdür. Bir il bundan öncə 4 oktyabr tarixində 44 günlük Vətən müharibəsi zamanı Azərbaycan Ordusunun əldə etdiyi uğurlar, Suqovuşanın işğaldan azad olunması erməniləri çox məyus etdi və onlar Azərbaycan Ordusunun qələbə qazanacağını anladılar. Bu prosesi dayandırmaq üçün döyüş bölgəsindən uzaq məsafədə dinc əhalinin yaşadığı Gəncə şəhəri düşmən tərəfindən hədəf alındı”.
Bu sözləri Editor.az-a açıqlamasında Milli Məclisin deputatı Naqif Həmzəyev deyib.
Millət vəkili bildirib ki, Gəncənin mərkəzi küçələrini hədəfləyən uzaq mənzilli raketlər dinc vətəndaşlarımızın şəhid olmasına, yaralanmasına səbəb oldu:
” Lakin düşmən məqsədinə çata bilmədi. Ali baş komandan cənab İlham Əliyevin ətrafında sıx birləşən xalqımız ordumuzun sonacan döyüşməsini və şəhidlərimizin qisasının alınmasını tələb edirdilər. 4 oktyabr tarixində Cəbrayılın işğaldan azad olunması ilə Gəncə terrorunun və şəhidlərimizin qisası alındı. 44 gün boyunca Ermənistandan fərqli olaraq Azərbaycan ədalətli və ləyaqətli döyüş apardı. Azərbaycan ordusu tərəfindən dinc əhali qətiyyən hədəf alınmadı, əli silah tutan erməni əsgərlərinə, terroristlərə qarşı döyüşərək onları məhv etdik. Döyüşdən 1 il keçməsinə baxmayaraq hələ də Ermənistanda revanşist fikirlərlə yaşayan qüvvələr var. Lakin getdikcə onlar da anlayırlar ki, Azərbaycana qarşı yenidən münaqişəni alovlandırmaq Ermənistana heç bir fayda verməyəcək, əksinə tamamilə məhvinə gətirib çıxaracaq. Azərbaycan qalib ölkə olaraq diktə edən tərəfdir və hər zaman sülh təklifi ilə çıxış edir. Ermənistan da bu təklifi düzgün dəyərləndirməli , Azərbaycanın şərtlərini qəbul edərək danışıqlar masasında əyləşməli, Azərbaycanın ərazi bütövlüyünü tanıyaraq sülh müqaviləsinin imzalanmasına razı olmalıdır”.
Naqif Həmzəyev qeyd edib ki, Prezident İlham Əliyev həm 44 günlük Vətən müharibəsi dövründə, həm də postmünaqişə dövründə bölgədə baş verən proseslərlə bağlı dolğun və düzgün məlumatların çatdırılması üçün çoxlu sayda yerli və xarici media agentliklərinə müsahibələr verdi:
” Bu gün də bu proses davam edir. Cənab Prezident İlham Əliyev öz müsahibələrində dəfələrlə erməniləri reallıqları qəbul etməyə, regionda sülhün qorunub saxlanılmasına töhfə verməyə çağırıb. Ötən gün Cənab Prezident İspaniyanın EFE informasiya agentliyinə verdiyi müsahibəsində də Ermənistanın baş naziri Nikol Paşinyanı hazır olduğu zaman danışıqlara dəvət etdi. Azərbaycan danışıqlara hər zaman hazırdır, hazır olmayan tərəf Ermənistandır. Ümid edirik ki, Ermənistan prosesleri düzgün dəyərləndirərək ən qısa zamanda Azərbaycan tərəfinin irəli sürdüyü şərtləri qəbul edəcək, üçtərəfli bəyannnamənin öhdəliklərini yerinə yetirməyə başlayacaq. Ermənistan xüsusilə Zəngəzur dəhlizinin işə düşməsi üçün real addımlar atmalıdır. Belə olduqda nəticə etibarilə regionda fəaliyyətə başlayacaq bütün kommunikasiya xətləri Cənubi Qafqazda uzunmüddətli sülhün bərqərar olmasına xidmət edəcək. Biz çox xoşbəxtik ki, bizim Cənab Prezident İlham Əliyev kimi liderimiz var. Döyüşdə əldə etdiyimiz qələbəni diplomatik uğurlarımızla davam etdirəcəyik. Azərbaycan xalqının keçmiş məcburi köçkünlərinin qısa zamanda öz dədə- baba yurdlarına qayıdışı gerçəkləşəcək”.