BMT qətnamələrinin icrasını Azərbaycan təkbaşına təmin etdi
Ermənistan 30 ilə yaxın müddətdə Azərbaycan ərazilərinin 20 faizini işğal altında saxladı. BMT Təhlükəsizlik Şurasının 1993-cü ildə qəbul etdiyi dörd qətnamə Ermənistan silahlı qüvvələrinin Azərbaycanın işğal edilmiş ərazilərindən dərhal, tam və qeyd-şərtsiz çıxarılmasını tələb edirdi. Lakin Ermənistan bu və BMT Baş Assambleyası, İslam Əməkdaşlıq Təşkilatı, Qoşulmama Hərəkatı, ATƏT, Avropa Şurası Parlament Assambleyası və Avropa Parlamenti kimi beynəlxalq təşkilatlar tərəfindən qəbul edilmiş bənzər qərarlara məhəl qoymurdu. BMT Təhlükəsizlik Şurasının bəzi qətnamələri bir neçə gün ərzində icra edildiyi halda, Azərbaycana gəldikdə 27 il icra olunmamış qaldı.
ATƏT-in Minsk qrupunun həmsədrləri Ermənistanı Azərbaycana qarşı hərbi təcavüzə son qoymağa məcbur etmək üçün qətiyyətli addımlar atmadılar, əvəzində işğal altındakı ərazilərdə eyş-işrətlə məşğul oldular.
Vətən müharibəsində şanlı qələbə ilə Azərbaycan faktiki olaraq, BMT Təhlükəsizlik Şurasının qətnamələrinin icrasını özü təmin etmiş oldu.