Azərbaycan Respublikasının Prezidenti İlham Əliyev sosial qayğıya ehtiyacı olan vətəndaşları hər zaman xüsusi nəzarətdə saxlayıb. Şəhid və qazi ailələrinin sosial təminatının yaxşılaşdırılması üçün dövlət bütün gücünü səfərbər edib. Həm Birinci, həm də İkinci Qarabağ müharibələri zamanı şəhid olmuş qəhrəman zabit və əsgərlərin ailələrinin mənzil təminatının, həmçinin qazilərin sosial vəziyyətinin yaxşılaşdırılması, eyni zamanda, müharibədə qəhrəmanlıqla döyüşmüş və qazi adı qazanmış veteranların avtomobillərlə təmin olunması üçün ölkədə bir çox sosial layihələr həyata keçirilib. Bu gün də belə sosial layihələr dövlət tərəfindən uğurla davam etdirilir.
AZƏRTAC xəbər verir ki, bu fikirləri Milli Məclisin deputatı, YAP İdarə Heyətinin üzvü Naqif Həmzəyev deyib.
Parlament üzvü bildirib: "44 günlük Vətən müharibəsində Azərbaycanın rəşadətli Ordusu Ali Baş Komandanın rəhbərliyi altında çox ləyaqətli və ədalətli savaş həyata keçirdi. Nəticədə, biz işğal altında olan Azərbaycan torpaqlarından erməni terrorist və faşistlərini qovub çıxarmağa nail olduq, onları rüsvayçı məğlubiyyətə uğratdıq. Bütün bunlara baxmayaraq, Prezident çıxışlarında deyirdi ki, Ermənistan siyasi rəhbərliyi ərazilərin boşaldılması üçün dəqiq tarix deyəcəyi təqdirdə biz döyüşləri dayandıracağıq və Ermənistan ordusu bizim torpaqlarımızı tərk etməlidirlər. Belə də oldu! Azərbaycan daha çox itki verməmək və qış aylarında müharibənin çətinliyini nəzərə alaraq Ermənistanı kapitulyasiya aktı imzalamağa məcbur etdi. Nəhayət, böyük əraziyə sahib Kəlbəcər, Laçın və Ağdam regionları bir güllə belə atılmadan işğaldan azad edildi. Hazırda həmin ərazilərdə quruculuq və abadlıq işləri həyata keçirilir".
N.Həmzəyev şəhid ailələri və qazilərlə görüş zamanı Prezidentin çıxışı barədə danışıb: Prezident İlham Əliyev şəhid ailələri və qazilərlə görüşdə bir daha səsləndirdi ki, biz yalnız yeddi rayonu yox, digər əraziləri də erməni işğalından azad etmişik. Biz ermənilərdən fərqli olaraq hərbi cinayət, soyqırımı törətməmişik. Erməni əsilli vətəndaşları, dinc əhalini bu ərazilərdən qovub çıxarmamışıq. Biz yeddi rayonla yanaşı Şuşanı, Hadrutu və Xocavəndin 60 faizindən çox ərazisini işğaldan azad etmişik. Digər ərazilər isə üçtərəfli Bəyanatın müddəalarına uyğun olaraq ermənilər tərəfindən boşaldılıb. Həmin ərazilərdə yaşayanlar vaxtilə Azərbaycan vətəndaşı olsa da, hazırda erməni əsilli insanlar, yolunu azmışlardır. Düşünürük ki, onlar da qısa zamanda haqq yoluna gələcəklər. Mütləq anlayacaqlar ki, sülhməramlı qüvvələrin həmin ərazilərdə yerləşdirilməsi müvəqqətidir və onların tək ümid qapısı Azərbaycan dövlətidir. Qısa zamanda haqq yoluna gələrək Azərbaycan vətəndaşlığını qəbul edəcək və Azərbaycan qaydaları çərçivəsində yaşamağa razılaşacaqlar".
Deputat vurğulayıb ki, Azərbaycan dövləti daim sosialyönümlü siyasəti ilə diqqət mərkəzindədir: "İlham Əliyev çox ağıllı, uzaqgörən və işini mükəmməl bilən, diplomatiya sirlərinə yiyələnmiş bir liderdir. Prezident nəyi, nə vaxt və necə edəcəyini hamıdan yaxşı bilir. Biz bir daha əmin olduq ki, Azərbaycan həqiqətən ədalətli və ləyaqətli müharibə aparıb. Müharibədə şəhid olmuş 3 minə yaxın şəhid ailəsinin mənzillə təmin olunması ilə əlaqədar Prezident xüsusi Sərəncam imzalayıb. Onların sosial qayğılarının təmin edilməsi üçün dövlət öz gücünü səfərbər edib. Həmçinin müharibə qazilərinin mənzil şəraitinin yaxşılaşdırılması və avtomobillə təminatı hələ də davam etdirilir. Ümumilikdə 2021-2025-ci illərdə 10 minə yaxın mənzil şəhid ailələrinə təhvil veriləcək. Burada Birinci vitse-prezident Mehriban xanım Əliyevanın da fəaliyyətini xüsusilə qiymətləndirmək lazımdır. O, hər zaman Prezidentin yanındadır və onun ən yaxın silahdaşı kimi məsuliyyətli vəzifəsinin öhdəsindən layiqincə gəlir. Məhz sosial təminat işlərində Prezidentin siyasətinin uğurla həyata keçirilməsində ona xüsusi dəstəyini göstərir. Heydər Əliyev Fondu davamlı olaraq həm şəhid ailələri və qazilərə, həm də müxtəlif sosial qruplara mənsub səhhətlərində problem olan uşaqların və yaşlıların müalicəsi üçün lazımi dəstəyi verir. Həmçinin Fond Azərbaycanda müalicəsi çətin olan xəstəliklərdən əziyyət çəkən qaziləri Türkiyəyə yollayır, onların sağlamlıqları üçün lazım olan hər şeyi edir. Fəaliyyətinə görə, birinci xanıma dərin təşəkkürlərimizi bildiririk. Bir sözlə, Prezident İlham Əliyev verdiyi bütün vədlərin arxasındadır. Əminliklə deyə bilərik ki, Azərbaycanın işğaldan azad olunmuş əraziləri Qarabağ və Şərqi Zəngəzuru cənnət məkana çevirəcək və keçmiş məcburi köçkünlər dədə-baba yurdlarına qayıdacaqlar. Tezliklə belə xoş günlərin şahidi olacağıq".