Koronavirusla bağlı dünyanın müxtəlif ölkələrindən verilən gündəlik məlumatlar yenə təşviş doğurur. Göründüyü kimi, bu təhlükəli virusa yoluxma və ölüm sayı durmadan artır. Ümumdünya Səhiyyə Təşkilatının məlumatına görə, artıq dünyada COVID-19-a yoluxanların ümumi sayı 210 milyonu ötüb, 4 milyon 406 mindən çox insan isə bu xəstəlikdən həyatını itirib.
İnfeksiyanın tüğyan etməsini epidemioloqlar koronavirusun yeni ştamlarının yayılması ilə əlaqələndirirlər. Belə ki, bu ölkədə hazırda “Delta”, “Britaniya” ştamları ilə bərabər, “Delta plyus” variantları da aşkar edilib. Ekspertlərin fikrincə, avqustun sonuna yaxın ölkədə “Delta”nın dominantlıq edəcəyi gözlənilir. Bəzi ekspertlər payızda beşinci dalğanın olacağını istisna etmirlər. Gürcüstan əhalinin hər 100 min nəfərinə düşən yoluxma sayına görə hazırda irəlidə gedən ölkələr sırasındadır. Mütəxəssislərin qənaətincə, Gürcüstanda pandemiyanın tüğyan etməsinin və ölüm hallarının artmasının əsas üç səbəbi var. Səbəblərdən birincisi, insanlarda peyvəndləməyə inamın az olması, ikincisi, vaksinasiyanın çox zəif aparılması, üçüncüsü isə tibbi maskalardan və digər vasitələrdən yetərincə istifadə olunmamasıdır. Gürcüstanın Xəstəliklərə Nəzarət və İctimai Səhiyyə Milli Mərkəzinin rəhbərinin müavini Paata İmnadze ölkədəki epidemioloji vəziyyətin Hindistandakı vəziyyətdən 5 dəfə ağır olduğunu açıqlayıb. Bildirib ki, “Delta” ştammı Gürcüstanda daha çox yayılır və digər ölkələrə ixrac olunur. “Delta” ştammını isə “Delta plyus” əvəz edir, bu gün xəstələrin 40-50 faizi məhz bu ştamma yoluxublar. Səhiyyə işçiləri pandemiya ilə əlaqədar daha ciddi tədbirlərin araşdırılmasını qadağaların tətbiqində görür. Hökumət isə iqtisadiyyata kömək məqsədilə hələlik ağır qapanmalara getmir. Turizm sezonu dövründə bu cür qapanmalar daha ağır nəticələrə səbəb ola bilər. Gürcüstana Rusiya, Ukrayna və Ərəb ölkələrindən gələn yüzlərlə turistin hesabına isə virus daha çox yayılmağa başlayıb.
Dünyada tüğyan edən koronavirus infeksiyası Azərbaycanda da təhlükəli mənbəyə keçib. Belə ki, COVID-19 virusuna yoluxma və ölüm sayında artım davam edir. Səhiyyə Nazirliyinin baş infeksionisti Təyyar Eyvazov bir həftədən çoxdur ki, ölkəmizdə koronavirusa yoluxma hallarında bu cür mənfi dinamikanın izlənməkdə olduğunu vurğulayıb. Bildirib ki, əgər bir müddət əvvəl rəqəmlər 200-dən artıq idisə, qısa müddətdə on dəfədən çox artıb: “Ətrafımızda olan digər ölkələrə diqqət etsək, görərik ki, həmin proses onlarda bizdən də daha əvvəl başlayıb və epidemioloji vəziyyət ölkəmizdəkindən daha pisdir. Lakin son günlərdəki artım onu deməyə əsas verir ki, Azərbaycanda da xəstəliyin növbəti alovlanma dövrü başlayıb. Bir müddətdir ki, bununla bağlı həyəcan təbilini çalırıq və əhalinin həmin infeksiya ilə necə mübarizə aparması, o cümlədən vaksinasiyanın əhəmiyyəti haqqında maarifləndirmə işini genişləndirməyə çalışırıq”.
Milli Məclisin deputatı Naqif Həmzəyev mövzu ilə bağlı “İki sahil”ə açıqlamasında bildirib ki, 2020-ci ildən başlayaraq, bütün dünya dövlətləri, o cümlədən Azərbaycan COVID-19 virusuna qarşı mübarizə aparır: “Belə ki, ötən dövr ərzində Azərbaycan dövləti vətəndaşının sağlamlığını qorunmaq üçün bütün lazımi tədbirləri həyata keçirir. Hətta 2021-ci ilin yanvarın 18-dən başlayaraq, ölkəmizdə vaksinasiya prosesi həyata keçirilməyə başlanıldı. Beləliklə, vaksinasiyanın sürətlə həyata keçirilməsi nəticəsində 2021-ci ili yaz aylarından etibarən yeni növ koronavirus infeksiyasına yoluxanların sayında kəskin azalmanın şahidi olduq ki, bu da bir sıra sahələrdə yumşalmalara gətirib çıxardı. Xüsusilə də Operativ Qərargah tərəfindən müəyyən qaydalar çərçivəsində toy şənliklərinin keçirilməsinə də icazə verildi. Ancaq təəssüflər olsun ki, bu cür yumşalmalar zamanı vətəndaşlarımız məsuliyyət hissini itirdilər, ötən ildəki çətin vəziyyəti unutdular”.
Deputat onu da diqqətə çatdırıb ki, bugünkü yoluxmanın artmasına səbəb vətəndaşlarımızın vaksinasiya prosesinə kütləvi şəkildə qoşulmaması ola bilər: “Unutmamalıyıq ki, yalnız bir doza vaksin vurdurmaqla iş bitmir. Ən azı ikinci doza vaksin də mütləq şəkildə vurulmalıdır. Bununla yanaşı koronavirus infeksiyasına yoluxmuş bəzi vətəndaşlar var ki, immunitet sertifikatı alırlar. Onların da xəstəliyin sonrakı 6 ayı tamam olduqdan sonra mütləq şəkildə vaksin olunması vacib şərtdir. Çünki pandemiyadan qorunmağın yeganə yolu məhz vaksinasiyadır. Yeri gəlmişkən onu da qeyd edim ki, 2021-ci il sentyabrın 1-dən bütün dövlət qurumlarının, o cümlədən də işi əhaliyə xidmətlə bağlı olan bütün dövlət və özəl müəssisələrin əməkdaşlarının ən azı 80 faizi vaksinin ilk dozasını almalıdır, oktyabrın 1-dən isə ikinci dozanı almalı və ya COVID-19 virusuna qarşı immunitet sertifikatına sahib olmalıdır. Göründüyü kimi, vaksinasiya kütləvi şəkildə həyata keçirilərsə, onda yoluxma sayında azalmanın şahidi olarıq. Eyni zamanada, vaksinasiya ilə yanaşı, bütün qaydalara da mütləq şəkildə riayət olunmalıdır. Bir sözlə, sərt karantin rejiminin geri qayıtmasını, qaydaların sərtləşdirilməsini istəmiriksə qapalı və açıq yerlərdə maska taxmalı, sosial məsafəni qorumalı, dezinfeksiyaedici məhlullardan istifadə etməliyik. Bəşəriyyətin topsuz-tüfəngsiz bəlası - koronavirusla savaşmağın yeganə yolu birlikdə, hamılıqla bu mübarizədə dövlətin tələblərinə riayət etməkdir. Beləcə, biz koronavirus pandemiyası savaşına mütləq şəkildə qalib gələcəyik. Çünki biz birlikdə güclüyük!