Gəncədə Heydər Əliyev Fondunun vitse-prezidenti Leyla Əliyevanın təşəbbüsü ilə hər il baş tutan “Xocalıya Ədalət” beynəlxalq kompaniyası çərçivəsində faciənin 28-ci il dönümü ilə əlaqədar “Xocalı Tarixin Qan Yaddaşı” adlı tədbir keçirilib. “Emedia Group” Media təşkilatının təşkilatçılığı ilə YAP Gəncə şəhər təşkilatıının qərargahında reallaşan tədbirdə Gəncə şəhər İcra Hakimiyyəti başçısının müavini Vəfa Abbasova, millət vəkilləri, ziyalılar və ictimaiyyət nümayəndələri iştirak ediblər.
Dövlət Himninin səsləndirilməsi ilə başlayan tədbir Qarabağ müharibəsində bir ailənin faciəsini özündə əks etdirən 10 dəqiqədən ibarət qısametrajlı “Məriz” filmi nümayişi ilə davam edib.
Xocalı soyqırımı qurbanlarının xatirəsi bir dəqiqəlik sükutla yad olunub.
Gəncə şəhər İcra Hakimiyyəti başçısının müavini Vəfa Abbasova, YAP Gəncə şəhər təşkilatıının sədri, millət vəkili Naqif Həmzəyev, “Məriz” filmin ssenari müəllifi, quruluşçu rejissoru, baş prodüsseri və montajçısı Elvin Abdullayev, Tural Nurməmmədov, Ülkər Əbülfət, Məhəbbət Paşayev, Əsəd Fərəcov və başqaları çıxış edərək, Xocalı faciəsindən, erməni vandalları tərəfindən əliyalın əhalinin başına gətirilən müsibətlərdən söz açıblar. Natiqlər “Xocalıya ədalət!” kampaniyası çərçivəsində görülən işləri yüksək qiymətləndirib, bəşəriyyət tarixində misli görünməyən soyqırımın Azərbaycan xalqının yaddaşından heç vaxt silinməyəcəyini qeyd ediblər.
Daha sonra tədbir iştirakçıları peşəkar rəssamların və heykəltaraşların əsərlərindən ibarət “Xocalı Tarixin Qan Yaddaşı” adlı beynəlxalq sərgi ilə tanış olublar.
