İsrailin yeni prezidenti nə vəd edir? – “Türkiyə ilə yaxınlaşma, Fələstin münaqişəsinin həlli..."
Xəbər veriyimiz kimi İsaak Herzoq İsrail prezidenti seçilib.
Liberal-solçu partiyasından olan prezidentin ölkə siyasətində hansı dəyişiklikləri edəcəyi maraq doğuran məsələrdəndir. Nəzərə alsaq ki, İsrail baş naziri Benyamin Netanyahu sağçı "Likud" partiyasındandır, bu, doğurdan da dəyişikliklərin olacağını istisna etmir.
Bəs, yeni prezidentin dönəmindən hansı gözləntilər var?
Prezident seçkilərinin nəticələrinə münasibət bildirən deputat Naqif Həmzəyev açıqlamasında İsaak Herzoqun münaqişələrin həllində maraqlı olduğunu deyib:
"İsraildə hakimiyyət postunda baş verən dəyişikliyi müsbət qiymətləndirirəm, çünki bu xalqın seçimidir. İsrailin xarici siyasətində əsas xətt var ki, onu dəyişdirmək elə də asan deyil. Bu baxımdan yeni prezident də əsas xəttə sadiq qalacaq. Xarici siyasətdə müəyyən dəyişikliklər olsa da əsas məqsəd regionda sülhün qorunması və yeni münaqişələrin baş tutmaması üçün müəyyən addımların atılması olacaq. Azərbaycan-İsrail münasibətləri məlum olduğu kimi artan xəttlə inkişaf edir və İsrail hökuməti bu prinsipdə də maraqlı olacaq. Yeni rəhbərliyin mövcud münaqişələrin sülh yolu ilə həllinə tərəf olması gözlənilir və regionda münaqişələr alovlanmayacaq".
Deputat yeni prezidentin hakimiyyəti dönəmində İsrail-Türkiyə münasibətlərinin də nizama düşəcəyini vurğulayıb:
"İsrail-Türkiyə münasibətlərində də müsbət irəliləyişlərin olmasını istərdik. Yeni rəhbərlik yeni dialoq imkanları deməkdir. Türkiyə artıq regionun aparıcı və söz sahibi olan ölkəsidir. İstər-istəməz iki dövlət arasındakı münasibətlərdə sərinlik var. Ancaq İsrailin yeni prezidenti ilə yarana biləcək yeni dialoq imkanlarını nəzərə alaraq münasibətlərdə yumşalmaların olacağını düşünürük. Çünki Türkiyənin xarici siyasətində müəyyən dəyişiklik müşahidə edirik, artıq bu ölkənin gücünü hər kəs qəbul etməkdədir. İsrail də istəyəcək ki, Türkiyə hökuməti ilə münasibətlərdə yumşalma olsun. Fələstin münaqişəsində Türkiyənin rolu böyükdür və münaqişə həlllini tapmalıdır. Çünki bu durumun heç bir ölkəyə faydası yoxdur".