Prezident İlham Əliyevin BMT-nin Asiya və Sakit okean üçün İqtisadi və Sosial Komissiyasının 77-ci sessiyasında çıxışı zamanı toxunduğu məqamlardan biri də “soyqırımı” iddiaları irəli sürən və bunun bütün dünya tərəfindən qəbul edilməsinə çalışan Ermənistanın Azərbaycan xalqına qarşı hərbi cinayətlər və Xocalı soyqırımını törədən ölkə olmasını qeyd etməsi oldu.
Publika.az-a danışan millət vəkili Naqif Həmzəyev deyib ki, Prezident İlham Əliyev BMT platformasından bu həqiqəti dünya ictimaiyyətinə çatdırmaqla, erməni faşizminin simasını növbəti dəfə ifşa etmiş oldu:
"Dövlət başçısı həm də ermənilərin iç üzünü açdı, onların əsl simalarını bütün dünya ictimaiyyətinə bir daha nümayiş etdirdi. 24 aprel qondarma "erməni soyqırımı" ilə əlaqədar erməni lobbisinin və erməni havadarlarının apardığı təbliğat və yalançı "soyqırımı"nın tanıdılması ilə bağlı görülən işlərin heç bir əsası yoxdur. Əksinə, ermənilər özləri soyqırımı, hərbi cinayətlər və terror törətmiş bir millətdirlər. Onlar birbaşa olaraq terrordan qaynaqlanan və terror təşkilatı vasitəsilə öz dövlətlərini qurmuş bir xalqdırlar. Ancaq təəssüflər olsun ki, ermənilərin xalqımıza qarşı həyata keçirdiyi soyqırımı siyasətini görməzdən gələn dövlətlər var. Dövlət başçısı məhz 1992-ci ildə Azərbaycanda Xocalı soyqırımını törədən ermənilərin nəyə qadir olduğunu xüsusi vurğuladı və dünya ictimaiyyətini həqiqəti görməyə çağırdı".
N.Həmzəyev qeyd edib ki, cənab Prezident bütün beynəlxalq təşkilatların tribunalarından və mötəbər kürsülərdən Azərbaycan həqiqətlərini hər zaman çatdırıb və dünya ictimaiyyətini ermənilərin əsl simalarını görməyə səsləyib: "Dövlət başçısının bu çıxışı da bu baxımdan olduqca əhəmiyyətli idi. Biz unutmamalıyıq ki, əgər regionda daimi sülhü əldə etmək istəyiriksə, ermənilərin faşist və xəstə təxəyyüllərindən əl çəkmələrinə nail olmalıyıq. Əksinə, bəzi dövlətlər hazırda erməniləri revanşist addımlar atmağa və qisas siyasəti həyata keçirməyə səsləyir və qıcıqlandırırlar. Təəssüflər olsun ki, hələ də regionda sülhü istəməyən qüvvələr var. Hər halda ermənilər həqiqəti görməlidirlər. Hələ də xəstə təxəyyülə və faşist ideologiyasına xidmət edən erməni siyasətçilərini, daşnakları tamamilə boykot etməlidirlər. Onlar anlamalıdırlar ki, yeganə çıxış yolu Azərbaycanla və Türkiyə ilə yaxşı münasibətlər qurmaq və region dövlətlərinə qarşı ərazi iddialarından əl çəkməkdən keçir. Əks halda Ermənistan öz müstəqilliyini sual altına sala bilər və ya ermənilər iqtisadi inkişaflarını öz əlləri ilə dayandırmış olacaqlar.
Cənab Prezidentin yalançı "erməni soyqırımı" iddiları ilə əlaqədar dünya ictimaiyyətinə səsləndirdiyi faktlar və çıxışlar alqışlanır. Az da olsa tarixi anlayan, bilən və müasir reallıqları dərk edən siyasətçilər və dünya ictimaiyyəti ermənilərin əsl simasını çox yaxşı bilirlər və onlara qarşı təzyiqləri həyata keçirəcəklər".