Naqif Həmzəyev: Azərbaycanın tam haqqı idi ki, döyüşdə əldə etdiyi qənimətləri sərgiləsin
Məlum olduğu kimi, bu günlərdə Prezident İlham Əliyevin açılışını etdiyi Hərbi Qənimətlər Parkı Ermənistan və onun havadarları arasında əsl zəlzələ effekti yaradıb. Hətta Ermənistandan gələn reaksiyalar bir daha təsdiq edir ki, sözügedən Parkın açılışı 44 günlük Vətən müharibəsindəki tarixi Qələbəmizdən sonra düşmənə və onun havadarlarına verilən növbəti dərs oldu. Bu mənada təsadüfi deyil ki, Ermənistanla yanaşı, daim onun havadarı qismində çıxış edən Fransa da Hərbi Qənimətlər Parkının açılışından ciddi narahatlığını ifadə edib.
Milli Məclisin deputatı Naqif Həmzəyev məsələ ilə bağlı qəzetimizə açıqlamasında bildirib ki, Hərbi Qənimətlər Parkının açılışı istər-istəməz həm düşmənin, həm də ona havadarlıq edən qüvvələrin maraqlarına ziddir: “Sözsüz ki, Azərbaycanın tam haqlı idi ki, döyüşdə əldə etdiyi qənimətləri sərgiləsin. Həm gələcək nəsillər, həm tarixçilər, həm də Azərbaycana səfər edəcək xarici qonaqların bu reallıqları daha yaxından görmələri üçün bu Park çox böyük önəm kəsb edir”.
N. Həmzəyev onu da vurğulayıb ki, Hərbi Qənimətlər Parkı kimi dünyada bir çox model mövcuddur: “Hətta biz dünyanın əksər dövlətlərində buna bənzər muzey və parklar görmüşük. Elə Avropa ölkələrinin özündə də qənimətləri əks etdirən muzeylər var ki, orada da döyüşlərdə iştirak etmiş əsgərlərin geyimləri, onların silahları əks olunub. Xüsusilə onu da qeyd edim ki, Əlcəzair tarixçisi Ali Farid Belkadi hələ 2010-2011-ci illərdə Fransada analoji muzey və Avropanın aparıcı zəfər muzeyləri ilə bağlı araşdırma aparıb və 68 əlcəzairli kəlləsini sözügedən muzeylərdə aşkar edib. Ümumilikdə, Fransadakı “l'Homme on Place du Trocadéro” muzeyində 18000 insan kəlləsi var və bu kəllələrin əksəriyyəti ictimaiyyətə açıq deyil. Məsələ ictimailəşəndən sonra prezident Emmanuel Makron 24 kəllənin 3 mart 2020-ci il tarixdə Əlcəzairə qaytarılmasına razılıq verib və qaytarılıb. 150 ildən artıq muzeydə nümayiş etdirilən 24 kəllə arasında Fransız işğalına qarşı xalq müqavimətinin altı liderinin cəsədlərinin qalıqları da olub. Əlcəzair xalqının müstəmləkəçiliyə qarşı vuruşan simalarından 12 nəfərin kəlləsi hazırda sözügedən muzeydə saxlanılır. İddialara görə, sözügedən 18000 kəllənin mütləq əksəriyyəti Fransanın tarix boyu müharibələrdə qalib gəldiyi döyüşlərdən qənimət kimi saxladığı kəllələrdir. Məhz bu fonda Fransanın Azərbaycanda belə bir Parkın açılışına irad bildirməsi sadəcə absurddur”.
“Təəssüflər olsun ki, düşmən yalançı tarixə, ideologiyaya əsaslanaraq iki əsrə yaxındır ki, bölgədə türklərə qarşı hərbi cinayət törədib” söyləyən deputat onu da bildirib ki, onların cavabını verə biləcək ən yaxşı vasitə məhz Hərbi Qənimətlər Parkının açılışı oldu: “Bunu etməklə Azərbaycan ən düzgün yolu seçdi. Düşünürəm ki, ermənilər və onların mövqeyini dəstəkləyən qüvvələr gec-tez reallığı anlayacaq və bölgədə ölkəmizin bərqərar etmək istədiyi daimi sülhü dəstəkləyəcəklər. Hətta üçtərəfli razılaşmada əldə edilmiş bütün müddəalar həyata keçiriləcək, bölgədə komunikasiya xətləri açılacaqdır. Ən azından sovetlər dönəmindəki mövcud olan komunikasiya işə düşdükdən sonra bölgədə daimi sülh bərqərar olacaq. Zatən Ermənistanın da yeganə çıxış yolu ərazi idialarından əl çəkmək, Azərbaycanla iqtisadi əlaqələri bərpa etmək və bölgədə sülhə tam dəstək olmaqdır. Əks təqdirdə Ermənistan ümumiyyətlə, öz müstəqilliyini sual altına sala bilər”.