Naqif Həmzəyev: “Ermənistan terror və təxribatdan uzaq olmalıdır, yoxsa...”
44 günlük müharibədə darmadağın olan və öz hərbi potensialının 80%-ni itirən Ermənistanda hələ də bəzi siyasətçilər tərəfindən təxribat xarakterli çağırışlar səslənməkdədir.
Bununla bağlı Moderator.az-a açıqlama verən millət vəkili Naqif Həmzəyev, təxribatların Ermənistanın özü üçün ağır nəticələrə səbəb olaccağını vurğulayıb:
“Ermənistanda hələ də müharibə ab-havasında olan qüvvələr var. Onlar 44 günlük müharibənin qisasını almaq və s. ilə bağlı gülünc çağırışlar səsləndirirlər. Ancaq onlar bilməlidirlər ki, əgər Ermənistan yenə təxribatlarına davam edərsə, yenə xam xəyallara qapılarsa, o zaman daha ağır zərbələrə məruz qalacaq. Bu dəfə Ermənistanın bir dövlət kimi mövcudluğu sual altına düşəcək. Ona görə də Ermənistan terror və təxribatdan uzaq olmalı, Azərbaycan və Türkiyə ilə normal münasibətlərin bərqərar olması üçün atması gərəkən bütün addımları atmalı və regionda sülh və təhlükəsizlik üçün əngəl yaratmamalıdır”.