Naqif Həmzəyev: “Beynəlxalq təşkilatların ekspertlərinin bu qalıqlara yerində baxış keçirməsi təmin olunmalıdır”
Xəbər verdiyimiz kimi, ötən gün Ermənistanın Şuşaya atdığı “İsgəndər” raketlərinin qalıqları nümayiş edilib.
Təcavüzkar dövlətin iç üzünün dünyaya tanıdılması, onun hərbi cinayətlərinin ifşası baxımından Ermənistanın Azərbaycana qarşı “İsgəndər” raketlərindən istifadə etməsi faktının beynəlxalq ictimaiyyətə çatdırılması nə dərəcədə əhəmiyyətlidir?
Bununla bağlı Moderator.az-a açıqlama verən millət vəkili Naqif Həmzəyev, bu faktın dünya birliyinə çatdırılmasının son dərəcə vacib olduğunu bildirib:
"Ermənistan Azərbaycana qarşı tarixən ağır hərbi cinayətlər törədib. 44 günlük Vətən müharibəsində də biz bu cinayətlərin şahidi olduq. Düşmən dinc insanları belə atəşə tutdu, nəticədə mülki vətəndaşlarımız şəhid oldu.
Digər uzaqmənzilli, ballistik mraketlərin istifadəsi artıq sübut olunmuş məsələdir. “İsgəndər”lərlə bağlı isə Ermənistanın özündə hərbi-siyasi dairılər arasında fərqli fikirlər səslənirdi. Belə ki, bəziləri Azərbaycana qarşı “İsgəndər”lərin tətbiq edildiyini bildirsə də, bəziləri bunu təkzib edirdi. Ancaq istənilən halda Şuşada tapılan “İsgəndər”lərin qalıqları bunu deməyə əsas verir ki, ermənilər bu raketlərdən ölkəmizə qarşı istifadə ediblər və bu raketlərin qalıqları da nümayiş edildi.
Biz indi çaışmalıyıq ki, bu fakt sadəcə Azərbaycanın dostlarına deyil, bütün dünya ictimaiyyətinə çatdırılsın. Bunun üçün isə mütləq türk mediasının gücündən istifadə etməliyik. Beynəlxalq təşkilatların ekspertlərinin bu qalıqlara yerində baxış keçirməsini təmin etməliyik. Maksimum çalışmalıyıq ki, ermənilərin iç üzünü, onların hərbi cinayətlərini dünyaya çatdıraq”.