Vətən müharibəsi zamanı erməni təxribatı nəticəsində mülki obyektlərə dəymiş ziyanın aradan qaldırılması üçün Gəncədə tikinti işlərinə başlanılıb. həyata keçiriləcək işlər Dövlət Şəhərsalma və Arxitektura Komitəsi tərəfindən aparılır.
ARB 24 kanalına müsahibə verən Milli Məclisin deputatı Naqif Həmzəyev bildirib. Millət vəkili qeyd edib ki, Gəncə şəhərində dağılmış çoxmənzilli evlərin ərazilərində hansı evlər ki, bərpası mümkündür, orada tikinti işlərinə başladılıb. Bərpası mümkün olmayan evlərin yerində isə yeniləri tikiləcək. Erməni vandallarının təcavüzkar siyasətinin qurbanı olan şəhidlərimizin əziz xatirəsini əbədiləşdirən xatirə kompleksi də həmin ərazilərdə yaradılacaq. Ölkə Prezidentimizin də qeyd etdiyi kimi xaricdən gələn qonaqlar görsünlər biz hansı vəhşilərə qarşı müharibə aparmışıq, öz torpağımızı və Cənubi Qafqazı hansı bəladan xilas etmişik.
Millət vəkili qeyd edib ki, ermənilərin hərbi cinayəti nəticəsində dağılan ərazilərin birində tarix memorial muzeyinin, abidənin salınması ilə bağlı həm Gəncə şəhər İcra Hakimiyyəti, həm də aidiyyatı orqanlar tərəfindən işlər aparılır. Dağıntılar altından erməni vandalizmindən zərər çəkmişlərə aid çoxlu sayda əşyalar çıxarılıb. Oyuncaqlar, dərs vəsaitləri, yanmış, kül olmuş əşyalar…. Bu əşyalar həmin muzeydə sərgilənəcək.