Bu günün qəhrəmanları gələcək nəslə örnəkdirlər
Son günlər ölkə başçısı Vətən Müharibəsində iştirak edən, qələbədə mühüm xidmətləri olan hərbçilərimizi müxtəlif medallarla təltif etməkdədir. Bəs bu təltiflər həm hərbçilərimizin xidmətinin dövlətimiz tərəfindən qiymətləndirilməsi, həm də bütün bu prosesə şahidlik edən gənc nəslin vətənpərvərlik ruhunda tərbiyəsi baxımından nə dərəcədə əhəmiyyətlidir
Moderator.az-a açıqlama verən millət vəkili Naqif Həmzəyev, baş verənlərin hər baxımdan əhəmiyyətli olduğunu qeyd edib: “2020-ci ilin 44 günü Azərbaycanın tarixində, qəhrəmanlıq salnaməsində yeni səhifə açdı. Bu səhifə Azərbaycan əsgərinin şücaəti, zəfər yürüşü, Ordumuzun Vətən uğrunda savaşı ilə qürurlandı, iftixar etdi. İişğalçı Ermənistan hakimiyyətinin növbəti hərbi təxribatı, bütün cəbhəboyu ağır artilleriyadan istifadə etməklə hücuma keçməsi və birbaşa mülki əhalini hədəfə alması Azərbaycan Ordusunun ayıq-sayıq hərbiçilərini Vətən uğrunda ölüm-dirim savaşına qaldırdı. Dünyanın suveren Azərbaycanın ayrılmaz tərkib hissəsi kimi tanıdığı Qarabağı və ətraf rayonları düşmən işğalından azad etmək üçün minlərlə igid və mərd oğullarımız “Vətən mənə oğul desə nə dərdim” deyərək sinəsini düşmən gülləsinə sipər etdi, Ana Vətəni azğın düşmənlərdən qorudular, illərlə vandalların, barbarların tapdağı altında qalan torpaqlarımızı əsl sahiblərinə qovuşdurdular.
Ali Baş Komandan İlham Əliyevin rəhbərliyi ilə müzəffər Azərbaycan Ordusunun düşmən tapdağında qalan el-obamızı əsirlikdən qurtarması, üçrəngli bayrağımızın azad olunmuş yaşayış məntəqələrindən asılması xalqın sevincinə, coşqusuna səbəb oldu, qürurla qarşılandı. Qələbəyə doğru inamla irəliləyən mərd, qorxmaz oğullarımız düşmənin işğal olunmuş torpaqlarımızdakı hərbi hissələrini, istehkamlarını, ön xətt mövqelərini, döyüş texnikalarını, canlı qüvvəsini darmadağın etdi, kəndlərimizi, strateji yüksəklikləri sürətlə düşməndən təmizlədi. Azərbaycan torpaqları qarış-qarış, kənd-kənd işğaldan azad edildi. 44 gün ərzində. üçrəngli şanlı bayrağımız yenidən düşməndən azad edilən doğma torpaqlarımızda ucaldıldı.
Bəli, o gün 30 illik Dağlıq Qarabağ münaqişəsinə nöqtə qoyulduğu gün oldu. Haqq savaşımız əzmkar oğullarımızın polad iradəsi sayəsində cəmi 44 gün ərzində qələbə ilə başa çatdı, tarixi ədalət zəfər çaldı. Azərbaycan parlaq qələbə qazanaraq Ermənistanı məğlub etdi.
“Dəmir yumruq” əməliyyatı adı ilə Azərbaycanın yeni tarixinə yazılan 44 günlük Vətən savaşı ərzində əsgərlərimizin hər biri öz şücaəti ilə qələbəmizə töhfə verdi. Azərbaycan xalqı qələbədə payı olan, döyüşdə iştirak edən hər bir əsgərin əziyyətini yüksək qiymətləndirir, şəhidlərimizi ehtiramla, minnətdarlıqla anır, qazandığımız qələbəyə görə bir ömür onlara borlclu olduğumuzu anlayır.
Dövlətimiz də igidlərimizin hər birinin əziyyətini dəyərləndirir. Elə Prezident İlham Əliyevin Azərbaycan Respublikası Silahlı Qüvvələrinin hərbi qulluqçularının təltif edilməsi haqqında imzaladığı Sərəncamlar, “Vətən Müharibəsində qələbə münasibətilə” Azərbaycan Respublikasının orden və medallarının təsis edilməsi igidlərimizə olan yüksək ehtiramdan irəli gəlir. Bu isə o deməkdir ki, ərazi bütövlüyümüzün bərpa edilməsi zamanı döyüş əməliyyatlarına yüksək peşəkarlıqla rəhbərlik etmiş, hərbi qulluq vəzifəsini yerinə yetirərkən igidlik və mərdlik nümunəsi göstərmiş Azərbaycan Respublikası Silahlı Qüvvələrinin əsgər və zabitləri diqqətdənkənar qalmır və heç bir zaman da qalmayacaqlar.
İgidlikləri, mərdlikləri, düşmənin bağrını yararaq qəhrəmanlıq dastanı yazan Azərbaycan oğulları layiq görüldükləri orden və medalları qürur və fəxarətlə ürəklərinin üstündə gəzdirəcək, gələcək nəslə örnək olacaqlar”.