Millət vəkili Naqif Həmzəyev Türkiyə Gənclər Fondu (TÜGVA) Eskişehir İl Başkanı Fatih Sertin “Instagram” səhifəsindəki canlı yayımın qonağı olub.
Fatih Sertlə, səhifənin izləyiciləri ilə Azərbaycanın 44 günlük Vətən Müharibəsində qazandığı Zəfərlə bağlı fikirlərini bölüşən millət vəkili böyük Qələbənin qazanılmasında Ali Baş Komandanımız İlham Əliyevin məqsədyönlü siyasətinə, rəşadətli Azərbaycan Ordusuna, igid, mədr Vətən oğullarına, ən başlıcası isə şəhidlərimizə, qazilərimizə borclu olduğumuzu qeyd edib.
Əsrlərin sınağından çıxan Azərbaycan-Türkiyə qardaşlığından danışan millət vəkili onu da vurğulayıb ki, ölkəmizin ən ağrılı problemi olan Dağlıq Qarabağ münaqişəsinin həllində Türkiyənin həmişə Azərbaycan xalqının yanında olması böyük dostluğumuzun, qardaşlığımızın ifadəsi və həmrəyliyimizin rəmzidir.vAzərbaycan Respublikasının Prezidenti İlham Əliyev və Türkiyə Cümhuriyyətinin Prezidenti Rəcəb Tayyib Ərdoğan arasında yaranmış dostluq və qardaşlıq münasibətləri ikitərəfli əlaqələrimizin bütün sahələrdə daha da genişlənməsinə öz müstəsna töhfəsini verir. Bu gün hər iki ölkə rəhbərliyi tərəfindən həyata keçirilən düzgün, məqsədyönlü siyasətin məntiqi nəticəsi olaraq Azərbaycanla Türkiyə arasında bütün sahələrdə, o cümlədən siyasi, iqtisadi, enerji, nəqliyyat, ticarət, humanitar, regional təhlükəsizlik, hərbi və digər sahələrdə əməkdaşlıq ən yüksək səviyyədə davam etdirilir.
Canlı yayımda Türkiyə və Azərbaycan Gənclər Fondlarının ortaq layihəsi olan Vətənimizin Qarabağ Zəfərinə həsr olunan rəsm müsabiqəsindən söz açılıb. O da qeyd edilib ki, Qarabağ Zəfərini türkiyəli və azərbaycanlı gənclərin gözü ilə görmək və hər iki ölkə gəncləri arasında qardaşlıq duyğularını daha da möhkəmləndirilməsinə xidmət edəcək.