“44 günlük haqq savaşında məğlub olan işğalçı erməni tərəfinin tör-töküntüləri Azərbaycanın işğaldan azad olunmuş ərazilərində atəşkəs rejiminin pozulması ilə müşayiət olunan təxribat əməlləri törətdilər. Digər tərəfdən isə Rusiya sülhməramlıları Azərbaycan, Rusiya prezidentləri və Ermənistanın baş nazirinin 10 noyabr tarixli birgə bəyanatında nəzərdə tutulan hüdudları aşan yeni xəritə çəkib təqdim etdilər. Ancaq onlar səhvlərini anladılar, əvvəlki xəritəni bərpa etdilər. Azərbaycan tərəfi heç vaxt bu cür haqsızlığa göz yuma bilməzdi”.
Bu sözləri Publika.az-a danışan millət vəkili Naqif Həmzəyev deyib.
O bildirib ki, dövlətimiz o torpaqları şəhidlərimizin qanı hesabına geri qaytarıb və belə hallar qəbuledilməzdir: “Dağlıq Qarabağda sülhməramlı missiyanı üzərinə götürən Rusiya sülhməramlılarının hazırlayıb yaydığı xəritə qeyri-real idi və səhvlərini anladılar. Haqlı mövqeyini müdafiə edən Azərbaycan tərəfi bununla bağlı xəbərdarlıq etdi və tədbirlər görüldü. Dövlətimiz dərhal sülhməramlılarla əlaqə yaratdı, məsələnin ciddiliyi onların diqqətinə çatdırıldı və bundan sonra anti-terror əməliyyatı keçirilərək həmin ərazilər terrorçulardan təmizləndi”.
N.Həmzəyev qeyd edib ki, Azərbaycan bu məsələdə qətiyyət və siyasi iradə nümayiş etdirib: “Ölkəmiz bir daha göstərdi ki, müvafiq razılaşmadan kənara çıxmağa, birtərəfli qaydada xəritələr tətbiq edərək ilkin razılaşmanın şərtlərini pozmağa heç kimə imkan verilməyəcək. Artıq rus sülhməramlılarının təqdim etdiyi xəritədə yanlışlıq aradan qaldırılıb və həmin ərazilərin Azərbaycanın nəzarətində olduğu bir daha təsdiqlənib”.