Minsk Qrupunun həmsədrləri zorakılığı dayandırmaq və 28 il ərzində yerinə yetirilməyən mandatı icra etmək üçün xüsusilə indi, Ermənistanın döyüş meydanında məğlub olduğu bir vaxtda öz rollarını oynamalıdırlar.
Heç kimə gizli deyil ki, bu məsələnin həlli həmsədr ölkələr gözardı ediblər.
Mövzu barədə Sonxeber.az-a deputat Naqif Həmzəyev danışıb:
"Qarabağ münaqişəsində atəşkəsə nəzarət missiyasını daşıyan ATƏT-in Minsk Qrupu həmsədrləri növbətçi görüşlərindən savayı, heç bir diplomatik səy göstərmir.
Ermənistan silahlı qüvvələrinin humanitar atəşkəs razılığından dərhal sonra Azərbaycanın ikinci böyük şəhəri olan Gəncənin mərkəzini dəfələrlə raket atəşinə tutmasının, dinc sakinlərin, o cümlədən azyaşlıların, qadınların qətlə yetirilməsinin, evlərinin yerlə yeksan edilməsinin dünya ictimaiyyəti ilə yanaşı ATƏT-in Minsk Qrupu da şahidi oldu".
Millət vəkili qeyd edib ki, 27 ildə olduğu kimi ATƏT-in Media Azadlığı üzrə nümayəndəsi, ATƏT-in Demokratik Təsisatlar və İnsan Haqları İnstitutu işğal edilmiş Azərbaycan torpaqlarında qanunsuz məskunlaşmaya, ekoloji vəziyyətin korlanmasına göz yumduğu kimi bu dəfə də ermənilərin bu vəhşiliyini, barbarlığını görməzdən gəldi:
"Minsk Qrupunun hesabat xarakterli səfərləri və mücərrəd ifadəli bəyanatları bu qrumun əməli baxımdan fəaliyyətsizliyindən xəbər verir. Ümumiyyətlə, yarandığı vaxtdan etibarən ATƏT-in Minsk Qrupunun qəbul etdiyi sənədlərdə Azərbaycanın ərazi bütövlüyünün, sərhədlərinin toxunulmazlığının, suverenliyinin bərpasının zəruriliyi bildirilsə də, indiyə qədər bu qurumun fəaliyyəti sülh prosesində arzu olunan nəticəni verməyib.
ATƏT-in Minsk Qrupu regionda sülh, sabitlik və tərəqqi, xalqların və millətlərin dinc, dostluq şəraitində yaşamağını doğrudan istəyirsə, Dağlıq Qarabağ münaqişəsinin ədalətli həlli naminə işğalçı tərəfə təsir göstərməlidirlər. O ki qaldı Minsk qrupunun bəyanatına, biz ondan başqa bəyanatlar, konkret addımlar gözləyirik.
Azərbaycan ATƏT-in Minsk Qrupundan növbətçi bəyanat deyil, Qarabağa sülh gətirəcək əməli addım gözləyir. Eyni zamanda, son hadisələr, həmsədrlik institutunun tərkibində dəyişikliklər edilməsi məsələsini vacib etdi. ATƏT-in Minsk Qrupu öz missiyasını həyata keçirə bilmirsə, o zaman həmsədrlər əvəzlənməli və Minsk Qrupuna üzv olan ölkələrdən digərləri həmsədrlik missiyasını öz üzərinə götürməlidir.
Bölgədəki sabitlik və əmin-amanlıq, mehriban qonşuluq siyasətinin yürüdülməsi üçün bu məsələdə ən real namizəd regionda tarixi-siyasi və mənəvi məsuliyyəti olan Türkiyədir. Türkiyənin Minsk Qrupu həmsədrləri sırasına daxil edilməsi regionda sülhə, sabitliyə ən yaxşı təminatdır".