Hər il 1 avqust tarixində Azərbaycanda Azərbaycan Əlifbası və Azərbaycan Dili Günü qeyd olunur. Bu əlamətdar gün ümummilli lider Heydər Əliyevin 9 avqust 2001-ci il tarixli Sərəncamına əsasən təsis edilib və Azərbaycan dilinin dövlət dili kimi inkişafı, qorunması və gələcək nəsillərə ötürülməsinin əhəmiyyətini vurğulayır.
Azərbaycan dilinin dövlət dili statusunun möhkəmləndirilməsi müstəqillik dövründə dövlət siyasətinin prioritet istiqamətlərindən biri olub. 1995-ci ildə qəbul edilən Azərbaycan Respublikasının Konstitusiyası ilə Azərbaycan dili dövlət dili kimi təsbit edildi. Daha sonra latın qrafikalı Azərbaycan əlifbasına tam keçidin təmin edilməsi məqsədilə ardıcıl hüquqi və institusional tədbirlər həyata keçirildi. Bu proses ölkənin informasiya məkanının müasirləşdirilməsi, milli-mədəni irsin qorunması və beynəlxalq inteqrasiyanın gücləndirilməsi baxımından mühüm əhəmiyyət daşıdı.
Ümummilli lider Heydər Əliyev Azərbaycan dilini milli kimliyin əsas dayaqlarından biri kimi qiymətləndirərək onun saflığının qorunmasını, elmi və rəsmi mühitdə tətbiqinin genişləndirilməsini daim diqqət mərkəzində saxlayıb. Onun təşəbbüsü ilə qəbul edilən qərarlar dil siyasətinin sistemli əsaslarını formalaşdırdı və dövlət dilinin hüquqi təminatını daha da gücləndirdi.
Prezident İlham Əliyev tərəfindən də bu siyasət ardıcıl şəkildə davam etdirilir. Dövlət başçısının imzaladığı sərəncam və fərmanlarla Azərbaycan dilinin rəqəmsal mühitdə istifadəsinin genişləndirilməsi, orfoqrafiya və terminologiya sahəsində islahatların aparılması, klassik və müasir ədəbiyyat nümunələrinin latın qrafikası ilə nəşri, eləcə də dil normalarının qorunması istiqamətində mühüm tədbirlər həyata keçirilir. Eyni zamanda, Azərbaycan dilinin xaricdə təbliği, diaspor təşkilatlarında ana dilinin tədrisi və beynəlxalq platformalarda istifadəsinin genişləndirilməsi də dövlət siyasətinin mühüm istiqamətlərindəndir.
Qloballaşma şəraitində müxtəlif dillərin qarşılıqlı təsirinin artdığı bir dövrdə Azərbaycan dilinin zənginliyinin və saflığının qorunması milli təhlükəsizlik, mədəni irs və dövlətçilik baxımından strateji əhəmiyyət daşıyır. 1 Avqust – Azərbaycan Əlifbası və Azərbaycan Dili Günü bu dəyərlərin cəmiyyətə çatdırılması, ana dilinə hörmətin gücləndirilməsi və milli-mənəvi irsin yaşadılması baxımından xüsusi önəm kəsb edir.
Naqif HƏMZƏYEV,
Milli Məclisin deputatı