Aprelin 23-də İrəvanda qondarma “erməni soyqırımı” ilə bağlı keçirilən yürüş zamanı radikal qruplar tərəfindən Türkiyə bayrağının yandırılması gərginlik yaradıb. Hadisə həm ictimai, həm də siyasi müstəvidə birmənalı qarşılanmayıb. Ermənistanın Baş naziri Nikol Paşinyan də bu addımı açıq şəkildə qınayıb. Ermənistan ilə Türkiyə arasında münasibətlərin normallaşması istiqamətində müəyyən addımların atıldığı bir dövrdə bu cür insidentlərin baş verməsi isə ciddi suallar doğurur.
Bəs, normallaşma prosesinin getdiyi bir vaxtda belə radikal addımlar nəyə hesablanıb? Bunun arxasında hansı siyasi mesajlar dayanır?
Naqif Həmzəyev deyib ki, vaxtilə erməniləri idarə etmək və onlardan istifadə məqsədilə saxta tarix yazılıb və ermənilər qondarma “soyqırımı” həqiqətlərini özləri üçün ideologiya kimi qəbul ediblər:
“İndi də hər il 24 aprel tarixini bu şəkildə qeyd edirlər. Təəssüflər olsun ki, sülh gündəliyinin aktiv olduğu bir dövrdə Ermənistan dövlətində, paytaxt İrəvanda keçirilən aksiyalar zamanı Türkiyə dövlət bayrağının yandırılması heç də yaxşı hal deyil və bu, qətiyyən qəbuledilməzdir. Faktiki olaraq, ermənilərin uzun illər inandığı bu ideologiya onlara heç nə qazandırmayıb. Sadəcə, sadə erməni xalqı ideoloqların və liderlərin alətinə çevrilib və bu gün də XXI əsrdə, 2026-cı ildə belə, ermənilər alət kimi istifadə olunmaqdadırlar. Faktiki olaraq, 30 ilə yaxın Azərbaycan torpaqları bu ideologiyaya xidmət edən daşnaklar tərəfindən işğal altında saxlanılıb. Nəticə etibarilə isə onlar heç nə əldə etmədilər, zərər görən sadəcə erməni xalqı oldu və bu gün də eyni proseslər davam edir”.
Deputat bildirib ki, bu tədbirləri təşkil edənlər revanşist qüvvələr və daşnaklardır:
“Lakin istənilən halda bu tədbirlərin keçirilməsinə icazə verilməsi və erməni polisi tərəfindən bayraq yandırılmasına göz yumulması o deməkdir ki, hazırkı erməni siyasi rəhbərliyinin də bu proseslərdə əli var.
Bir növ bu proseslərə “dur” demək gücünü özlərində tapa bilmirlər. Xüsusilə seçkiöncəsi dövrdə onlar səsləndirdikləri fikirlərin əksinə gedərək, məhz bu erməni millətçilərinin törətdiyi cinayətlərə göz yumurlar. Uzun illər Azərbaycan torpaqlarında tarixi və mədəni abidələrini viran qoyan, dağıdan erməni daşnaklar bu gün də eyni siyasəti fərqli formada davam etdirirlər. Bu baxımdan erməni milliyyətçiləri reallıqları dərk etməlidirlər. Əgər Azərbaycan və Türkiyə ilə münasibətləri normallaşdırmaq, sülh şəraitində yaşamaq yolunu seçirlərsə, bu revanşistlərə də “dur” deməli və dövlət bayrağının yandırılmasına qətiyyən göz yummamalıdırlar”.
Naqif Həmzəyev hesab edir ki, bu proseslər zamanla daha da azalacaq:
“Çünki faktiki olaraq millətçilik, düşmənçilik və radikal mövqe heç kimə fayda verməyib və xüsusilə də ermənilərə bu siyasət heç bir qazanc gətirməyib. Nəhayət, ermənilər anlamalıdırlar ki, alət olmaq dövrü bitməlidir. Onlar alət olduqları müddətdə yenə də istifadə olunacaqlar.
Nəticədə müvəqqəti uğur deyil, uzunmüddətli uğursuzluq əldə edəcəklər. Mən İrəvanda keçirilən aksiyalar zamanı Türkiyə bayrağının yandırılmasını pisləyirəm və erməni siyasi rəhbərliyindən bu cinayəti törədən şəxslərin cəzalandırılmasını tələb edirəm”.