“Azərbaycan Respublikasının Prezidenti İlham Əliyev aprelin 6-da birinci xanım Mehriban Əliyeva ilə birlikdə Gürcüstana dövlət səfəri həyata keçirib. Tbilisinin Şota Rustaveli Beynəlxalq Hava Limanında rəsmi qarşılanma mərasimindən başlayan səfər çərçivəsində Gürcüstan Prezidenti Mixeil Kavelaşvili və Baş naziri İrakli Kobaxidze ilə görüşlər keçirilib, mətbuata birgə bəyanatlar verilib. Dövlət başçısı həmçinin Qəhrəmanlar Memorialını və Tbilisidəki Heydər Əliyev adına mədəniyyət və istirahət parkındakı Ümummilli Liderin abidəsini ziyarət edib.
Azərbaycan ilə Gürcüstan arasındakı münasibətlər sadə ikitərəfli diplomatiya çərçivəsini çoxdan aşıb. Bu səfər həmin strateji tərəfdaşlığın ən yüksək səviyyədə bir daha təsdiqi kimi qiymətləndirilir. Görüşlərdə vurğulandığı kimi, əlaqələr dostluq, mehriban qonşuluq və strateji tərəfdaşlıq prinsipləri üzərində qurulub. Prezidentin sözləri ilə desək, “Azərbaycan və Gürcüstan arasındakı münasibətlər bütün qonşular üçün nümunə ola bilər”.
Bu sözləri Prezident İlham Əliyevin Gürcüstana dövlət səfərini şərh edən Milli Məclisin deputatı Naqif Həmzəyev deyib.
Deputat iki ölkə arasında ticarət sahəsindəki əlaqələrə toxunub:
“Səfərin ən əhəmiyyətli iqtisadi göstəricilərindən biri ticarət dövriyyəsinin dinamikasıdır. Keçən il iki ölkə arasındakı ticarət həcmi 800 milyon dolları ötüb. 2025-ci ilin ilk rübündə isə artım tendensiyasının davam etdiyi bildirilir. Prezident ilin sonuna ticarətin 1 milyard dollara çata biləcəyini proqnozlaşdırıb. Bundan əlavə, bu günədək Azərbaycan tərəfindən Gürcüstan iqtisadiyyatına 3,7 milyard dollar sərmayə yatırılıb. Bu rəqəm iki ölkə arasındakı iqtisadi inteqrasiyanın nə qədər dərin olduğunu açıq şəkildə göstərir.
Orta Dəhliz – Çindən Avropaya uzanan Transxəzər nəqliyyat marşrutu – məhz Azərbaycan və Gürcüstan ərazilərindən keçir. Bu coğrafi reallıq iki ölkəni bir-birindən ayrılmaz tərəfdaşa çevirir. Görüşlərdə bu dəhliz üzrə əməkdaşlığın genişləndirilməsi müzakirə olunub. Azərbaycan Prezidenti Orta Dəhlizi “əsas nəqliyyat damarı” adlandıraraq onun inkişafına əlavə səylər göstəriləcəyini bəyan edib”.
N. Həmzəyev səfər çərçivəsində Tbilisidə keçirilən görüşlərdə liderlərin Azərbaycan-Ermənistan münasibətlərinin normallaşması və bunun Cənubi Qafqazda müsbət təsiri ilə bağlı müzakirələrinə də toxunub:
“Səfərin diqqətçəkən istiqamətlərindən biri regional sülh məsələsidir. Görüşlərdə Azərbaycan-Ermənistan normallaşma prosesinin Cənubi Qafqazda sabitlik baxımından əhəmiyyəti xüsusi qeyd olunub. Prezident sülhün yalnız sənədlərin imzalanması ilə deyil, həm də ticarətin artırılması və iqtisadi əlaqələrin gücləndirilməsi ilə möhkəmləndiriləcəyini vurğulayıb. Bu prosesdə Gürcüstanın vasitəçi rolunun da əhəmiyyətli olduğu bildirilib.
Prezident açıq şəkildə qeyd edib: “Bu gün Cənubi Qafqazda yeni vəziyyət yaranmaqdadır”. Ermənistanla sülh danışıqları yeni mərhələyə qədəm qoyub, region ölkələri arasında münasibətlər yenidən formalaşır. Belə bir dövrdə Bakı-Tbilisi oxunun daha da möhkəmləndirilməsi regional balansın qorunması baxımından strateji zərurətə çevrilir”.
Sonda həmsöhbətimiz görüşü yüksək qiymətləndirərək bunun gələcək proseslərə təsir edəcəyini vurğulayıb:
“Gürcüstanın Avropaya inteqrasiya istəkləri ilə Azərbaycanın Avropa bazarlarına enerji ixracı maraqları bir-birini tamamlayır. Yaşıl enerji sahəsində əməkdaşlıq da görüşlərin gündəliyinə daxil edilib. Qlobal enerji mənzərəsinin sürətlə dəyişdiyi bu dövrdə iki ölkənin birgə enerji layihələrinin strateji əhəmiyyəti artır.
Prezident Gürcüstandakı siyasi sabitliyi xüsusi vurğulayıb və bunun investisiya mühiti üçün əsas şərt olduğunu qeyd edib. Bu mesaj həm ikitərəfli münasibətlər, həm də beynəlxalq investorlar üçün mühüm siqnaldır.
Prezident İlham Əliyevin Gürcüstana bu dövlət səfəri sıradan diplomatik ziyarət deyil. Bu səfər bir tərəfdən onilliklər boyu formalaşmış strateji tərəfdaşlığın yeni mərhələyə keçidini, digər tərəfdən isə Cənubi Qafqazda sülh, sabitlik və iqtisadi inteqrasiya üçün ortaq vizionu ifadə edir. Ticarət həcminin 1 milyard dollara doğru artması, nəqliyyat dəhlizlərinin genişləndirilməsi və regional sülh prosesindəki birgə mövqe bu səfərin həm tarixi, həm də gələcəyə yönəlmiş əhəmiyyətini açıq şəkildə göstərir”.