"Suverenliyə qarşı belə addımlara göz yummaq region üçün təhlükəli presedent yaradır".
Bunu açıqlamasında Milli Məclisin deputatı Naqif Həmzəyev bildirib.
O deyib ki, beynəlxalq hüququ kobud şəkildə pozan bu hücum regionda sülh və sabitliyə birbaşa ziddir.
"5 mart 2026-cı il tarixində Naxçıvan Muxtar Respublikası İran ərazisindən buraxıldığı bildirilən dronların hədəfinə çevrilib. Dronlardan biri Naxçıvan Hava Limanının terminal binasına, digəri isə Şəkərabad kənd məktəbinin yaxınlığına düşüb. Nəticədə hava limanına ciddi ziyan dəyib, iki mülki şəxs xəsarət alıb. Mülki infrastrukturun hədəfə alınması bu hadisəni açıq düşmənçilik aktı kimi qiymətləndirməyə əsas verir. 28 fevraldan etibarən ABŞ və İsrailin İranın hərbi obyektlərinə qarşı əməliyyatları fonunda Tehran müxtəlif istiqamətlərə dron və raket zərbələri endirib. Azərbaycan isə bu prosesdə tərəfsiz mövqe tutub, heç bir hərbi koalisiyaya qoşulmayıb və İrana qarşı addım atmayıb. Buna baxmayaraq, rəsmi Bakı xoş niyyət nümayiş etdirdiyi halda, Naxçıvanın hədəfə alınması hərbi məntiqdən uzaq və siyasi xarakterli provokasiya təsiri bağışlayır".
Deputat bildirib ki, BMT Nizamnaməsinə əsasən, dövlətlərin ərazi bütövlüyünə qarşı güc tətbiqi qadağandır.
"Naxçıvan Azərbaycanın ayrılmaz hissəsidir və hava limanı ilə məktəb ətrafı hərbi obyekt sayılmır. Bu baxımdan hücum həm beynəlxalq hüququn, həm də humanitar normaların pozulmasıdır. İstər nəzarətsiz dron ssenarisi, istərsə də qəsdən gərginlik yaratmaq cəhdi olsun, nəticə etibarilə Azərbaycanın suverenliyi tapdalanıb. Azərbaycan Xarici İşlər Nazirliyi İran səfirini çağıraraq etiraz notası təqdim edib və cavab tədbirləri görmək hüququnu özündə saxladığını bəyan edib. Bununla yanaşı, beynəlxalq ictimaiyyət də bu hücuma prinsipial mövqe bildirməlidir. Suverenliyə qarşı belə addımlara göz yummaq region üçün təhlükəli presedent yaradır. Azərbaycan öz ərazi bütövlüyünü və təhlükəsizliyini qorumaqda qətiyyətlidir".