“Biz bu günü dərin hüzn və matəm olaraq qeyd edirik. Amma əvvəlki illərdən fərqli olaraq bizim içimizdə həm də bir qürur var. Çünki biz ləyaqətlə, şərəflə bütün şəhidlərimizin qisasını ala bildik”.
Bunu Xocalı soyqırımının 34-cü ildönümü ilə əlaqədar fikirlərini bölüşən Milli Məclisin deputatı Naqif Həmzəyev deyib.
Deputat bildirib ki, Xocalı soyqırımını anmaqla yanaşı, Böyük Vətən müharibəsində qazanılan Qələbə nəticəsində şəhidlərin qisasının alınması və Xocalının 34 ildən sonra əvvəlkindən də yaxşı vəziyyətə gətirilməsi xüsusi əhəmiyyət daşıyır:
“Hər iki Qarabağ müharibəsi zamanı seperatizm siyasətinin həyata keçirilməsində iştirak edən erməni hərbiçi və siyasətçilərinin bir çoxunun Azərbaycanda qanun qarşısında cavab vermələrinə şahid olduq. Artıq bu proseslər yekunlaşdı. On minlərlə şahidlərin iştirak etdiyi məhkəmədə onların cinayətləri sübuta yetirildi. Biz şükürlər olsun ki, bu soyqırımların törədilməsində əli olan bəzi şəxslərin qanun qarşısında cavab verməsini təmin edə bildik. Bu Azərbaycan dövlətinin, Ali Baş Komandanın bizlərə bəxş etdiyi sevincdir”.
N.Həmzəyev Xocalıdan qaçqın düşən sakinlərin doğma yurda qayıdış prosesinin hələ davam edəcəyini də vurğulayıb:
“Bununla yanaşı, biz artıq Xocalı sakinlərinin də didərgin düşdüyü doğma yurdlarına qayıtmalarının şahidi oluruq. Artıq xeyli Xocalı sakini öz dədə-baba torpağına qayıdıb və bu proses hələ də davam edir. Yəqin ki, yaxın günlərdə də Xocalı şəhərinə və ətraf kəndlərinə qayıdış prosesi davam edəcək”.
Millət vəkili qeyd edib ki, faciənin dünya ictimaiyyətində unudulmaması üçün mühüm addımlar atılmalıdır:
“Bu bəlkə də misli görünməmiş bir hadisədir – bir dövlət öz ərazilərini işğaldan azad edə, həmin torpaqlarda quruculuq-abadlıq işlərini həyata keçirə, həmçinin oradan köçkün düşmüş insanları geri qaytara… Bu Azərbaycan dövlətinin güclü siyasətinin nəticəsdir.
Xocalı faciəsində şəhid olan bütün şəhidlərimizə Allahdan rəhmət, yaralılara isə şəfa diləyirəm. Eyni zamanda, bu faciədə ailə üzvlərinin əksəriyyətini itirmiş şəxslərə də Allahdan səbr diləyirəm! Əsas odur ki, biz qisasımızı ədalətli şəkildə alıb, həmin torpaqlara qayıda bilmişik. Bütün bunlara baxmayaraq, biz tariximizi – başımıza gətirilən bu müsibətləri, Xocalı faciəsini unutmamalı və unutdurmamalıyıq. Xocalı faciəsinin şahidləri ilə mütəmadi görüşməli, onları tanıtmalıyıq. Bu müsibətləri həm dünya ictimaiyyətinə, həm də gələcək nəsillərə çatdırmaq məqsədilə filmlər hazırlanmalıdır”.
Sonda deputat Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət” kampaniyasının əhəmiyyətinə də toxunub:
“Fürsətdən istifadə edib, Azərbaycan dövlətinə, o cümlədən də Heydər Əliyev Fondunun vitse-prezidenti Leyla xanım Əliyevaya dərin təşəkkürümü bildirirəm ki, zamanında başlatdığı “Xocalıya ədalət” kompaniyası öz bəhrəsini verir və verməkdədir. Artıq dünya ictimaiyyəti Xocalı faciəsini qəbul edir. Artıq biz inanırıq ki, bu soyqırıma digər dövlətlər də lazimi qiymət verəcəklər. Əksər parlamentlərdə Xocalı faciəsi “soyqırım” olaraq tanınacaqdır. Biz ümid edirik ki, erməni siyasi rəhbərliyi və bu soyqırımda əli olan insanlar Azərbaycan xalqından üzr istəyəcəklər və törətdikləri bu müsibəti bir daha təkrarlamayaqlarına dair söz verəcəklər. İnanırıq ki, soyqırımda əli olan digər cinayətkarları da Ermənistan dövləti Azərbaycana təhvil verəcəkdir. Onlar da qanun qarşısında cavab verəcəklər.
Allah dövlətimiz var, Cənab Prezidentimizin canını isə sağ eləsin. Həmişə bir və güclü olaq. Bir daha başımıza bu müsibətlərin gətirilməməsi üçün gücümüzə güc qataq”.