“Bu faciədə əli olan şəxslər törətdikləri əməllərə görə məsuliyyət daşıyacaq, bölgədə sülh və ədalət tam şəkildə bərqərar olacaq”.
Bunu açıqlamasında Milli Məclisin deputatı Naqif Həmzəyev deyib.
O, Xocalı faciəsinin ildönümünün anılması, ədalətin təmin olunması, torpaqların azad edilməsi və məcburi köçkünlərin doğma yurdlarına qayıdışı barədə fikirlərini səsləndirib.
Deputat bildirib ki, Xocalı soyqırımının 34-cü ildönümünü dərin hüzn və matəm hissi ilə qeyd edirik.
“Lakin əvvəlki illərdən fərqli olaraq, bu gün qəlbimizdə həm də qürur hissi var. Çünki biz ləyaqətlə, şərəflə və ədalətli şəkildə həm Birinci Qarabağ müharibəsinin, həm İkinci Qarabağ müharibəsinin, ümumiyyətlə, bütün şəhidlərimizin qisasını ala bilmişik.
Bununla yanaşı, Xocalı faciəsində, Birinci və İkinci Qarabağ müharibələrində, eləcə də separatizm siyasətinin həyata keçirilməsində iştirak etmiş bir sıra erməni hərbçilərinin və siyasətçilərinin Azərbaycanda qanun qarşısında cavab verdiyinə şahidlik etdik. Artıq həmin proseslər yekunlaşıb, onların cinayətləri sübuta yetirilib. On minlərlə şahid bu proseslərdə iştirak edib və tam olmasa da, ən azından bu soyqırımın törədilməsində əli olan bəzi şəxslərin məsuliyyətə cəlb olunmasına nail olunub.
Bu, Azərbaycan dövlətinin gücünün, Ali Baş Komandanın rəhbərliyi ilə əldə olunan uğurların göstəricisidir. Sevindirici haldır ki, bu gün artıq Xocalı sakinlərinin öz dədə-baba torpaqlarına qayıdışını və orada yenidən məskunlaşmasını görürük. Çoxlu sayda Xocalı sakini doğma yurduna qayıdıb və bu proses davam edir. Yaxın günlərdə də Xocalı şəhərinə və ətraf kəndlərə qayıdışın davam edəcəyi gözlənilir.
Bəlkə də bu, nadir hallarda rast gəlinən bir hadisədir ki, dövlət öz ərazilərini işğaldan azad edir, həmin torpaqlarda geniş quruculuq və abadlıq işləri aparır və doğma yurdlarından didərgin düşmüş insanları yenidən ora qaytarır. Bu, Azərbaycan dövlətinin gücünün və həyata keçirdiyi uğurlu siyasətin nəticəsidir.
Xocalı faciəsində şəhid olan bütün soydaşlarımıza Allahdan rəhmət diləyirəm. Yaralananlara şəfa, ailə üzvlərini itirənlərə səbir arzulayıram. Əsas odur ki, biz bu faciələrin təkrarlanmasının qarşısını ala bilmişik, doğma torpaqlarımıza qayıtmışıq və haqq mübarizəmizi ləyaqətlə aparmışıq.
Bununla belə, tariximizi unutmamalı, başımıza gətirilən müsibətləri yaddaşımızda yaşatmalı və gələcək nəsillərə ötürməliyik. Xocalı faciəsinin canlı şahidləri ilə mütəmadi görüşlər keçirilməli, onların xatirələri qeydə alınmalı, bu hadisələrlə bağlı filmlər və araşdırmalar hazırlanmalıdır. Həm dünya ictimaiyyəti, həm də gələcək nəsillər bu faciə barədə dolğun şəkildə məlumatlandırılmalıdır.
Fürsətdən istifadə edərək Azərbaycan dövlətinə, o cümlədən Heydər Əliyev Fondunun vitse-prezidenti Leyla xanım Əliyevaya təşəkkürümü bildirirəm. Vaxtilə başladılan “Xocalıya ədalət” kampaniyası öz bəhrəsini verməkdədir. Dünya ictimaiyyəti Xocalı faciəsi barədə daha çox məlumatlanır. Bir sıra ölkələr bu hadisəyə artıq hüquqi-siyasi qiymət verib. İnanırıq ki, digər dövlətlər də bu faciəyə lazımi qiymət verəcək və onu soyqırımı kimi tanıyacaqlar.
Ümid edirik ki, bu faciədə əli olan şəxslər törətdikləri əməllərə görə məsuliyyət daşıyacaq, bölgədə sülh və ədalət tam şəkildə bərqərar olacaq”, — deyə o bildirib.