“ABŞ-nin Vitse-prezidenti Ceyms Devid Vensin Azərbaycana səfər etməsi ABŞ və Azərbaycan münasibətlərinin inkişafına əla töhfədir. Xüsusilə vitse-prezident səviyyəsində səfərin reallaşması ABŞ-nin Azərbaycana verdiyi prioritetin göstəricisidir. Biz unutmamalıyıq ki, Azərbaycan Avropanın enerji təhlükəsizliyində mühüm rol oynayır. Cənubi Qafqaz Dəhlizi layihəsi və digər enerji marşrutları Avropanın digər dövlətlərdən olan enerji asıllığını azaltmaq üçün çox önəm daşıyır”.
Bu sözləri açıqlamasında Milli Məclisin deputatı Naqif Həmzəyev bildirib.
Onun sözlərinə görə, ABŞ bu prosesdə Azərbaycanı açar tərəfdaş kimi görür: “Məhz bu səfər zamanı imzalanan Xartiya ABŞ ilə Azərbaycan arasında münasibətləri irəli aparır. Avqust ayında əldə edilmiş razılaşmanın davamı olaraq bu Xartiyanın imzalanması Azərbaycan-ABŞ münasibətlərində yeni səhifənin açılmasını açıq şəkildə bəyan edir. Məhz bu Xartiyada amerikalıların investisiya və biznes maraqlarını qorumaq, ticarəti genişləndirmək üçün hüquqi siyasi çərçivə formalaşır. Neft-qaz, digər sektorda da əməkdaşlıq üçün əla imkanlar təqdim edir. Bütün bunlarla yanaşı bu Xartiyanın Azərbaycan üçün çox böyük faydası var. İlk növbədə beynəlxalq mövqe möhlkəmlənməkdədir, təhlükəsizlik zəmanətləri güclənir, regional münaqişələrdə ABŞ Azərbaycan ərazi bütövlüyünü tanıyır və dəstəkləyir. Eyni zamanda ABŞ süni intellekt və İT sahəsində də Azərbaycanla əməkdaşlıq, tərəfdaşlıq etmək niyyətindədir. Bir sözlə, bu, Azərbaycan beynəlxalq münasibətlər sistemində mövqeyini gücləndirməyə, ABŞ və Azərbaycan münasibətlərinin ən yüksək səviyyəyə çatdırılmasına təkan olacaq. Bu səfərdən sonra da Azərbaycan öz xarici siyasətində balanslaşdırılmış mövqeyini daha da gücləndirəcək və Azərbaycan regionun aparıcı dövləti olmaq mövqeyini qoruyub saxlayacaqdır".