Amerika Birləşmiş Ştatlarının (ABŞ) Vitse-prezidenti Ceyms Devid Vens fevralın 10-da Azərbaycan Respublikasına rəsmi səfərə gəlib.
Vitse-prezidentin səfərini şərh edən deputat Naqif Həmzəyev bildirdi ki, Vensin Azərbaycana səfər etməsi Amerika Birləşmiş Ştatları və Azərbaycan münasibətlərinin inkişafına əla bir töhfədir. Onun fikrincə, xüsusilə vitse-prezident səviyyəsində səfərin reallaşması Amerika Birləşmiş Ştatlarının Azərbaycana verdiyi prioritetin göstəricisidir.
"Biz unutmamalıyıq ki, Azərbaycan Avropanın enerji təhlükəsizliyində mühüm rol oynayır. Cənubi Qafqaz Dəhlizi layihəsi və digər enerji marşrutları Avropanın digər dövlətlərdən enerji asılılığını azaltmaq üçün çox böyük önəm daşıyır və ABŞ da bu proseslərdə Azərbaycanı açar tərəfdaş kimi görür. Məhz bu səfər zamanı imzalanan xartiya ABŞ ilə Azərbaycan arasındakı münasibətləri daha irəli səviyyəyə aparır. Avqust ayında əldə edilmiş razılaşmaların davamı olaraq bu xartiyanın imzalanması Azərbaycan-ABŞ münasibətlərində yeni səhifənin açıldığını açıq şəkildə bəyan edir. Bu xartiya amerikalıların investisiya və biznes maraqlarının qorunması, ticarətin genişləndirilməsi üçün hüquqi-siyasi çərçivə formalaşdırır, neft-qaz sektorundan kənarda da əməkdaşlıq üçün əla imkanlar təqdim edir. Bütün bunlarla yanaşı, bu xartiyanın Azərbaycan üçün də çox böyük faydası var, ilk növbədə, beynəlxalq mövqe möhkəmlənir, təhlükəsizlik zəmanətləri güclənir, regional münaqişələrdə ABŞ Azərbaycanın ərazi bütövlüyünü tanıyır və dəstəkləyir. Eyni zamanda ABŞ süni intellekt, süni zəka və İT sahələrində Azərbaycanla əməkdaşlıq etmək, tərəfdaşlıq qurmaq, Amerika şirkətlərinin Azərbaycana sərmayə qoyması üçün əla imkanlar təqdim edir", - deyə deputat yekunlaşdırdı.
Xatırladaq ki, ötən gün Bakıda “Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası”nın imzalanma mərasimi keçirilib.
Sənədi Azərbaycan Prezidenti İlham Əliyev və ABŞ-nin Vitse-prezidenti Ceyms Devid Vens imzalayıblar.