"Azərbaycan və Ermənistan arasında əldə edilmiş ikitərəfli razılaşma və humanizm prinsiplərinə əsaslanaraq bu addımın atılması düzgündür".
Bunu deputat Naqif Həmzəyev Cinayət Məcəlləsinin müxtəlif maddələri ilə təqsirli bilinərək ölkəmizdə cəza çəkən Vaqif Xaçaturyan, Gevorq Sujyan, David Davtyan və Vigen Eulcekyanın Ermənistana təhvil verilməsinə münasibət bildirərkən dedi.
"Xüsusilə vurğulamalıyıq ki, Ermənistan tərəfinə təhvil verilmiş bu şəxslər digər erməniəsilli şəxslərdən fərqli olaraq daha az cinayət proseslərində iştirak ediblər. Onların yaşları və səhhəti, eləcə də istintaq müddətində xüsusi xidmət və istintaq orqanları ilə yaxından əməkdaşlıq etmələri, digər cinayətlərin üstünün açılmasına kömək göstərmələri və öz günahlarını etiraf edərək bağışlanma istəmələri bu şəxslərə qarşı humanist addım atılmasının əsas səbəbləridir. Xüsusilə qeyd etməliyik ki, Azərbaycan və Ermənistan arasında sülhün reallaşması üçün qarşılıqlı humanist addımlar atılır. Hərçənd bu məsələdə Azərbaycan tərəfi daha çox səy göstərir. Eyni zamanda unutmamalıyıq ki, sülhə məcburetmə siyasətini də məhz Azərbaycan həyata keçirir və regionda uzunmüddətli, dayanıqlı sülhün əldə olunmasını ən çox Azərbaycan istəyir. Azərbaycan bu məqsədin reallaşması üçün bütün mümkün alətləri səfərbər edib", - deyə o, qeyd etdi.
Parlamentari vurğuladı ki, Ermənistan da bu sülh gündəminə sadiq qalaraq digər öhdəliklərini də yerinə yetirəcək:
"Xüsusilə qeyd etməliyik ki, Nikol Paşinyan hökumətinin növbəti parlament seçkilərində qələbə qazanması vacibdir. Belə olacağı təqdirdə sülhün reallaşması daha tez baş tuta bilər. Əks halda, başqa qüvvələr hakimiyyətə gələrsə, sülhün reallaşması uzana bilər ki, bu da istər-istəməz planlarımıza uyğun deyil. Xüsusilə kənar qüvvələrin yenidən Ermənistan vasitəsilə Cənubi Qafqazda möhkəmlənməsi heç kimin maraqlarına cavab vermir. Bu baxımdan düşünürəm ki, atılmış bu humanist addım çox yerində və zamanında edilmiş bir jestdir. İnanıram ki, Ermənistan tərəfi bunu düzgün qiymətləndirəcək, Ermənistan ictimaiyyəti və vətəndaşları da bu proseslərdən düzgün nəticə çıxaracaq və revanşist qüvvələrin güclənməsinə imkan verməyəcəklər".