"Ulu Öndər milli kimliklə müasirliyin vəhdətini yaratmaqla Azərbaycanın həm daxili inkişafına, həm də beynəlxalq nüfuzuna yeni məna verdi." - millət vəkili Naqif Həmzəyev
Ulu Öndər Heydər Əliyevin anım günü Azərbaycan xalqı üçün yalnız böyük dövlət xadiminin xatırlanması deyil, həm də onun yaratdığı dövlətçilik məktəbinin dərin mahiyyətinə nəzər salmaq üçün mühüm tarixi anıdır.
Millət vəkili Naqif Həmzəyev bildirir ki, “Heydər Əliyev ideyaları bu gün müasir Azərbaycanın dayaq sütunları, sabitlik və inkişafın əsas təminatçısıdır”. Ona görə də həmin ideyaların cəmiyyət həyatındakı rolunu xatırlamaq həm borc, həm də məsuliyyətdir. Heydər Əliyev müasir Azərbaycanın dövlətçilik fəlsəfəsini yalnız siyasi idarəetmə modeli kimi deyil, milli şüurun və ictimai həmrəyliyin birləşdirici təməli kimi formalaşdırıb. Ulu Öndərin yaratdığı sabitlik mühiti, hüquqi dövlət konsepsiyası, insan amilini dövlət siyasətinin mərkəzinə qoyması bu gün vətəndaş cəmiyyətinin mövcudluğu və inkişafı üçün əsasın kim tərəfindən yaradıldığını qəti şəkildə göstərir.
Millət vəkili vurğulayır ki, 1995-ci il Konstitusiyasının qəbul olunması ilə Azərbaycanda hüquqi dövlətin bünövrəsi qoyuldu, insan hüquqları, ictimai institutların fəaliyyəti, media və qeyri-hökumət təşkilatlarının işləmə mexanizmi Heydər Əliyev tərəfindən müəyyən edilmiş çərçivəyə yerləşdirildi.
“Bu gün biz cəmiyyət olaraq rahat şəkildə fəaliyyət göstəririksə, söz azadlığından, ictimai nəzarət imkanlarından danışırıqsa, bu, Ulu Öndərin gördüyü böyük işlərin nəticəsidir”, – deyə Naqif Həmzəyev bildirir.
Deputatın fikrincə, Heydər Əliyevin siyasi irsinin ən mühüm cəhətlərindən biri dövlət və cəmiyyət münasibətlərində qarşıdurma deyil, dialoq və əməkdaşlıq fəlsəfəsinin üstün tutulmasıdır. “Dövlət vətəndaş üçündür” prinsipi Heydər Əliyevin idarəçilik məktəbinin ana xəttidir və bu gün bu fəlsəfənin yaşadılması vətəndaş cəmiyyətinin əsas vəzifələrindən biridir.
Naqif Həmzəyev eyni zamanda bildirir ki, Ulu Öndər milli kimliklə müasirliyin vəhdətini yaratmaqla Azərbaycanın həm daxili inkişafına, həm də beynəlxalq nüfuzuna yeni məna verdi. Bu çərçivədə formalaşan ictimai düşüncə, mədəniyyət, təhsil və informasiya siyasəti bu gün cəmiyyətin əhəmiyyətli fəaliyyət istiqamətlərini müəyyən edir.
Millət vəkili hesab edir ki, bu gün vətəndaş cəmiyyətinin Heydər Əliyev mirasına ən böyük məsuliyyəti sabitlik və milli maraqların qorunmasına dəstək olmaqdır. O qeyd edir: “Azərbaycanın gücü onun iç birlik və həmrəyliyindədir. Bu həmrəyliyi qorumaq hər birimizin üzərinə düşən tarixi və mənəvi borcdur”.
Bununla yanaşı, hüquqi mədəniyyətin gücləndirilməsi, ictimai nəzarətin sivil qaydada təşviqi, maarifçilik ənənələrinin davam etdirilməsi və beynəlxalq aləmdə Azərbaycanın haqq səsinin yetirilməsinə ictimai dəstək də bu məsuliyyətin mühüm tərkib hissələridir.
Naqif Həmzəyev yekunda bildirir ki, Heydər Əliyevin formalaşdırdığı dövlətçilik ideologiyası yalnız keçmişin mirası deyil, bu gün Azərbaycan cəmiyyətinin inkişafına istiqamət verən strateji xəttdir. “Ulu Öndərin ideyalarını yaşatmaq – dövlətçilik maraqlarını qorumaq, cəmiyyətin sağlam inkişafına töhfə vermək, vətəndaş məsuliyyətini artırmaq deməkdir. Bu yolda hər birimiz üzərimizə düşəni etməliyik”.