“Bildiyiniz kimi, 44 günlük Vətən müharibəsi zamanı və ondan sonrakı dövrdə Fransa Azərbaycana qarşı olduqca sərt və ədalətsiz mövqe sərgiləmişdi. Fransa, xüsusilə də Prezident Emmanuel Makronun rəhbərlik etdiyi hökumət, Ermənistanı haqsız yerə müdafiə edir və faktiki olaraq Azərbaycana qarşı cəbhədə dayanırdı.
Lakin Azərbaycanın həyata keçirdiyi “sülhə məcburetmə” siyasəti, Vaşinqtonda baş tutan görüşlər və əldə edilən razılaşmalar nəticəsində Ermənistan-Azərbaycan münasibətlərində müəyyən yumşalmalar baş verib. Artıq rahatlıqla demək olar ki, sülhə əvvəlkindən daha yaxınıq”.
Bu fikirləri Azərbaycan-Fransa münasibətlərini şərh edərkən Milli Məclisin deputatı Naqif Həmzəyev səsləndirib.
O xatırladıb ki, son 1 il yarım ərzində sərhəddə atəşkəs pozulmayıb və faktiki olaraq 12 kilometrlik delimitasiya həyata keçirilib:
“Bu proseslə bağlı komissiyalar xüsusi olaraq fəaliyyət göstərir. Bu uğurlar nəticə etibarilə Fransa hökumətini, xüsusilə də Makronu siyasətini dəyişdirməyə məcbur etdi. Son dövrlərdə biz artıq münasibətlərdə yumşalma əlamətləri görürük. Prezident İlham Əliyevlə Emmanuel Makron arasında keçirilən görüşlərdə əvvəlki dövrlərlə müqayisədə daha səmimi münasibətlərin yarandığı hiss olunur. Xüsusilə də son Şarm-əl-Şeyxdə keçirilən sülh sammiti zamanı Makronun həm Prezident Rəcəb Tayyib Ərdoğanla, həm də Prezident İlham Əliyevlə səmimi görüşləri, fərqli bədən dili və diqqət göstərməsi münasibətlərin dəyişdiyinin göstəricisidir”.
Fransa hökumətinin keçmiş siyasətindan söz açan millət vəkili qeyd edib ki, əvvəllər həyata keçirdiyi ədalətsiz strategiya iki ölkə arasındakı münasibətlərdə gərginliyə səbəb olmuşdu:
“Bu gərginliyin tam aradan qaldırılması üçün isə müəyyən vaxt tələb olunur. Xarici işlər naziri Ceyhun Bayramov ilə fransalı həmkarı Benjamin Haddad arasında keçirilən görüş də bu məqsədə – münasibətləri normallaşdırmağa yönəlib.
Mən inanıram ki, Fransa artıq keçmiş səhvlərini anlayıb və münasibətlərin düzəlməsi üçün ciddi addımlar atacaq. Bunun nəticəsində biz siyasi və diplomatik sahədə daha da yaxınlaşma müşahidə edə bilərik.
Yekun olaraq, qəti şəkildə deyə bilərik ki, Azərbaycanın həyata keçirdiyi uğurlu xarici siyasət öz məntiqi nəticəsini verir. Fransa da sonda bu siyasətin qarşısında geri çəkilməyə məcbur oldu. Bu, Prezident İlham Əliyevin şəxsi keyfiyyətləri və siyasi məharətinin nəticəsidir. Artıq Avropa ölkələri də Azərbaycanın regiondakı artan rolunu qəbul edirlər.
Eyni zamanda, bu gün Azərbaycan həm regionun aparıcı dövləti, həm də Avropanın enerji təhlükəsizliyində vacib rol oynayan bir ölkəyə çevrilmişdir. Bu reallıq beynəlxalq təşkilatları və əvvəllər Azərbaycana qarşı qərəzli mövqe tutan dövlətləri siyasətlərinə yenidən baxmağa məcbur edir”,– deyə o əlavə edib.