Bu gün 44 günlük Vətən müharibəsi zamanı Bərdədə erməni silahlı qüvvələrinin törətdiyi terror aktından 5 il ötür. Həmin raket hücumu nəticəsində 5 nəfər şəhid olub, 13 nəfər isə yaralanıb.
Yaddaşlardan silinməyən bu qanlı tarixlə bağlı danışan deputat Naqif Həmzəyev 44 günlük Vətən Müharibəsində qazanılan qələbə və ədalət hissi ilə bağlı öz təəssüratlarını bölüşüb.
Deputatın sözlərinə görə, Azərbaycan 44 günlük müharibədən sonra uğurlu sülh siyasətini həyata keçirə bilib və suverenliyini tam bərpa edib:
“44 günlük Vətən müharibəsi zamanı Ermənistan tərəfi və separatçılar çox təəssüf olsun ki, Azərbaycanın döyüş bölgəsindən uzaqda yerləşən, xüsusilə dinc əhalinin yaşadığı ərazilərə uzaq mənzilli raketlər və istifadəsi qadağan olunmuş bombalar atdılar. Məhz bu hücumlar nəticəsində çox sayda dinc sakinimiz şəhid oldu və yaralandı. Şəhər təsərrüfatına və mülki obyektlərə böyük ziyan dəydi.
Bu şəhərlər sırasına mütləq Gəncə, Goranboy, Naftalan, Mingəçevir, Bərdə və Tərtər şəhərlərinin adını qeyd etmək lazımdır. Xüsusilə Bərdə şəhəri mərkəzinə kaset bombaları atılması nəticəsində çoxlu insan həlak oldu. Nəticədə bir çox dinc sakin şəhid edildi.
Artıq bu hücumdan 5 il keçib. 5 il ərzində şükürlər olsun ki, Azərbaycan uğurlu sülhə məcburetmə siyasətini həyata keçirə bildi, Ermənistana sülhün vacib olduğunu başa saldı və onu təxribatlardan çəkindirməyə nail oldu. 2023-cü ildə Azərbaycan suverenliyini tam olaraq bərpa etdi. Artıq demək olar ki, sülh gündəlikdə daha realdır. İnamlar böyükdür, daimi sülhün mümkün olacağına ümid var”.
N.Həmzəyev Ermənistanda sülhə mane olmaq istəyən qüvvələri xatırladaraq vurğulayıb ki, hər iki dövlət arasında sülh tam bərpa olunsa belə, Azərbaycan xalqı keçmişini unutmamalıdır:
“Bütün bunlara baxmayaraq, Ermənistanda revanşist fikirlərə malik insanlar və sülh istəməyən kənar qüvvələr hələ də var və bu prosesə maneçilik törətməyə çalışırlar. İstənilən halda Azərbaycan günbəgün gücünü artırır. Azərbaycan 5 il əvvəlkindən xeyli güclüdür və bu, həyata keçirilən layihələrin uzunmüddətli, davamlı olmasına imkan verir.
Hətta sülh yüz faiz reallaşsa belə, keçmişimizi, üzərimizə gətirilmiş müsibətləri və bizə qarşı törədilmiş faciələri qətiyyən unutmamalıyıq və unutdurmamalıyıq. Ötən 5 il ərzində bütün şəhid ailələri, qazilər və müharibədən zərər çəkmiş insanlar dövlətin qayğısı ilə əhatə olunub. Şükürlər olsun ki, keçmiş məcburi köçkünlərimiz Qarabağa, Şərqi Zəngəzurda öz dədə-baba torpaqlarına köçürülür, həmin ərazilərdə normal həyat bərpa olunur və zəfərimizi Azərbaycanda bütün sahələrə yaymışıq. İqtisadiyyatımız məhz bunun sayəsində daha da güclənir və genişlənir”.
Deputat son olaraq, Azərbaycanın birliyinin vacibliyini vurğulayaraq, hər cür təxribatlara qarşı birlikdə durmağın önəmindən danışıb:
güclü olsa, bizə qarşı belə xain hücumlar və təxribatlar törədilməyəcək. Bu baxımdan da biz nə olursa olsun, ordu, xalq və lider Ali Baş Komandan birliyini qoruyub-saxlamalıyıq. Bu birliyin varlığı üçün hər kəs öz payını səfərbər etməli və daim dövlətimizin yanında olmalıdır.
Allah bütün şəhidlərimizə rəhmət eləsin. İnanırıq ki, gələcək nəsillər bu faciələri qətiyyən unutmayacaq,unutdurmayacaq və hər zaman Azərbaycanı güclü etmək üçün öz töhfələrini əsirgəməyəcəklər”.