Naqif Həmzəyev: “Azərbaycan xalqı Gəncə faciəsinə baxmayaraq, mübarizədən dönmədi”
Vətən müharibəsi dövründə Gəncə şəhərinin Ermənistan Silahlı Qüvvələri tərəfindən üçüncü dəfə raket hücumuna məruz qalmasından beş il ötür.
2020-ci ilin oktyabrın 8-də gecə saatlarında Azərbaycanın ikinci ən böyük şəhəri növbəti dəfə atəşə tutulub.
Digər iki terrordan fərqli olaraq bu gecə saatlarında Gəncəyə endirilən ilk raket zərbəsi idi. Nəticədə ölən və yaralananlar olmasa da, evlər və nəqliyyat vasitələri ciddi zərər görüb.
Qeyd edək ki, İkinci Qarabağ müharibəsi dövründə Ermənistan silahlı qüvvələri tərəfindən Gəncə şəhərinə ümumilikdə beş dəfə (4, 5, 8, 11, 17 oktyabrda) raket və ağır artilleriya ilə hücum edilib. Nəticədə 26 nəfər şəhid olub, 175 nəfər yaralanıb, şəhərdə yerləşən mülki infrastruktur obyektlərinə, nəqliyyat vasitələrinə külli miqdarda ziyan dəyib.
İkinci Qarabağ müharibəsində ümumilikdə Ermənistanın hərbi təcavüzü nəticəsində 12-si uşaq, 27-si qadın olmaqla 93 mülki şəxs həlak olub, 454 mülki vətəndaş yaralanıb, ümumilikdə 12 292 yaşayış və qeyri yaşayış sahəsinə, 288 nəqliyyat vasitəsinə ziyan dəyib, 1 018 fermer təsərrüfatı üzrə zərər faktı aşkar edilib.
Deputat Naqif Həmzəyev bildirib ki, bu gün II Qarabağ müharibəsindən artıq 5 il ötür:
"Müharibənin gedişində aktiv döyüşlərin getdiyi ərazilərdən çox-çox uzaqlarda yerləşən rayon və şəhərlərimiz, o cümlədən Gəncə şəhəri dəfələrlə uzaqmənzilli raketlərlə atəşə tutuldu. Təəssüf ki, dinc əhalinin yaşadığı məhəllələrə endirilən bu raket zərbələri nəticəsində çoxlu sayda Gəncə sakini şəhid adını aldı, yaralananlar, valideynlərini itirən uşaqlar oldu. Hətta bu hücumların travmasını hələ də üzərindən ata bilməyən insanlar var. Şəhərin infrastrukturu da ciddi şəkildə zərər gördü. Bu raket hücumları nəticəsində biz bir daha erməni vəhşiliyinin və erməni cinayətkarlarının əsl simasını gördük. 1992-ci ildə azərbaycanlılara qarşı törədilmiş Xocalı faciəsi ilə Gəncə, Goranboy, Mingəçevir, Naftalan və Bərdəyə edilən bu raket hücumları arasında müəyyən bənzərlik görürəm. Necə ki, ermənilər 1992-ci ildə törətdikləri soyqırımı ilə azərbaycanlıların gözünü qorxutmaq, xüsusilə qadınlara, uşaqlara və qocalara qarşı qəddarlıq göstərərək insanlarda daimi qorxu hissi yaratmaq istəyirdilər. Bu səbəbdən bir çox kənd və şəhərlərdə ailələr, uşaqlar təhlükəsizlik məqsədilə köçürüldü, yalnız kişilər qaldı. Nəticə etibarilə həmin torpaqlar daha sonra erməni havadarlarının dəstəyi ilə işğal edildi. II Qarabağ müharibəsi zamanı da düşmən eyni məqsədlə – dinc əhalinin gözünü qorxutmaq, müharibənin dayandırılması üçün təzyiq göstərmək məqsədilə bu raket hücumlarını həyata keçirdi.
Ancaq bunun tam əksi baş verdi: Azərbaycan xalqı, xüsusilə də Gəncə sakinləri, hər zaman Ali Baş Komandanın yanında olduqlarını bəyan etdilər. Onlar sona qədər mübarizənin aparılmasını istədilər. Şükürlər olsun ki, Azərbaycan Silahlı Qüvvələri döyüş meydanında qəhrəmancasına vuruşaraq, bütün şəhidlərimizin, o cümlədən Gəncədə həlak olmuş dinc sakinlərin qisasını aldı. Məhz həmin raket hücumları nəticəsində dağıdılmış ərazilərdən birində Memorial Kompleks – xatirə muzeyi inşa olundu və Cənab Prezident İlham Əliyev 27 sentyabr Anım Günü münasibətilə bu kompleksin açılışını etdi. Bu muzey Gəncədə törədilmiş faciələrin xatirəsini yaşadan böyük bir xatirə kompleksidir. Muzeyin ətrafında salınan parkda gələcək nəsillər bu hadisələri unutmadan, tariximizə dərindən bələd olacaqlar".
Deputat əlavə edib ki, sülh bərqərar olsa da, münasibətlər normallaşsa da, biz tariximizi unutmamalıyıq:
"Xüsusilə də dinc sakinlərə qarşı törədilmiş bu kimi müsibətləri unutmaq və unutturmaq olmaz. Bizim borcumuz hər zaman Azərbaycanın güclü və qüdrətli olmasına çalışmaqdır. Azərbaycan güclü olduqca, heç kimin cəsarəti çatıb xalqımıza təhdid yarada bilməz. Allah bütün şəhidlərimizə rəhmət etsin, qazilərimizə can sağlığı versin. Bütün şəhid və qazi ailələrinə səbr diləyirəm. Biz şükür edirik ki, Ali Baş Komandanımız, Cənab Prezident İlham Əliyev var, güclü ordumuz və əzmkarlığı ilə seçilən dövlətimiz var. Bu gün Azərbaycan öz suverenliyini tam bərpa edib, sərhədlərimiz boyunca Silahlı Qüvvələrimiz mövqelərini daha da möhkəmləndirir. Artıq xalqımızı belə təhlükələr gözləmir. Lakin biz yenə də hər zaman ayıq-sayıq olmalı, dövlətimizin, Ali Baş Komandanımızın və liderimizin yanında dayanmalıyıq".