Türkiyə - Azərbaycan əməkdaşlığı 100 il bundan öncə də regionda sabitliyi təmin edib, indi də. Bunu CBC-yə müsahibəsində millət vəkili, Türkiyə-Azərbaycan parlamentlərarası əlaqələr üzrə işçi qrupunun üzvü Naqif Həmzəyev deyib. Bildirib ki, iki qardaş ölkə sevincli və çətin günlərdə bir-birinə dəstək olur. Türkiyə prezidentinin Azərbaycanın dövlət başçısına zəng edərək Tovuz istiqamətində hərbi qulluqçunun şəhid olması ilə bağlı başsağlığı verməsi bunu bir daha sübut edir.
Azərbaycan və Türkiyənin qardaşlıq münasibətləri özünü real iqtisadi layihələrdə də göstərir. Bütün bunlar Azərbaycanın gücünü artırmaqla yanaşı, həm də Türkiyəyə verilən dəstəkdir.
Xatırladaq ki, ötən gün Türkiyə Prezidenti Rəcəb Tayyib Ərdoğan Prezident İlham Əliyevə zəng edib. Söhbət zamanı dövlət sərhədində Ermənistanın təxribatı müzakirə olunub. Dövlət başçıları dost və qardaş Türkiyə ilə Azərbaycanın həmişə olduğu kimi, bundan sonra da bir-birinin yanında olacağını vurğulayıblar. BMT Baş Assambleyasının 75-ci sessiyasında çıxış edən Türkiyə lideri Dağlıq Qarabağ münaqişəsini də gündəmə gətirib. Azərbaycan torpaqlarının işğalını və Ermənistanın Tovuz istiqamətində dövlət sərhədində törətdiyi təxribatı pisləyib.