“Çoxmərtəbəli binaların vahid istilik sistemi ilə təmin edilməsinə ciddi ehtiyac var və bu vətəndaşlar üçün böyük əhəmiyyət kəsb edir. Amma köhnə beşmərtəbəli binaların vahid istilik sistemi ilə təchizatında problemlər yaşanacaq”.
Bunu deputat Asif Əsgərov Milli Məclisdə “İstilik təchizat haqqında” qanun layihəsi ilə bağlı keçirilən dinləmədə çıxışı zamanı deyib.
“Sovet dönəmində bütün çoxmərtəbəli binalar vahid istilik mərkəzindən qızdırılırdı. Hətta binaların döşmələrində istilik sistemi var idi. Köhnə beşmərtəbəli binaların istilik sistemi ilə təchiz edilməsi zəruri olsa da, “Azəristilik” ciddi çətinliklərlə üzləşəcək. Yəni bu binaların bütün sakinlərinin razılığı olmadan bunu həyata keçirmək mümkün olmayacaq. Çünki bəzi vətəndaşlar artıq özünü fərdi şəkildə komfortlu istilik sistemi ilə təmin edib. Amma yeni tikilən və ya tikiləcək çoxmərtbəli bina tikintisində problem olmayacaq”, - deputat bildirib.
O eyni zamanda əlavə edib ki, burada isti su istifadəsi və qaz sayğacının quraşdırılması ilə bağlı mexanizmlər müəyyənləşdirilməlidir.
Deputat Vüqar Rəhimzadə də qeyd edib ki, köhnə binaların mərkəzləşdirilmiş istilik sistemi vasitəsilə istiliklə təchizatı elə də asan olmayacaq. “Artıq köhnə binalarda yaşayan insanların bir çoxu artıq özü fərdi qaydada istilik sistemini təmin edib”, – o qeyd edib.
Deputat Naqif Həmzəyev isə qanunun tətbiqi zamanı tariflərin artırılıb-artırılmayacağından narahatlığını dilə gətirərək deyib ki, bu necə tənzimlənəcək, yoxsa innovativ qaydalar tətbiq olunacaq. O bu məsələ ilə bağlı aidiyyəti olan qurumların aydınlıq gətirməsini xahiş edib.