Türkiyə və Pakistan liderlərinin Azərbaycana səfəri, eyni zamanda ölkəmizdə keçirilən ikinci Türkiyə-Azərbaycan-Pakistan Zirvə görüşü əlamətdar və tarixi hadisə kimi yadda qalacaq. Azərbaycanın müstəqilliyinin 107-ci ildönümündə belə mötəbər tədbirin reallaşması, milli maraqlarımıza xidmət etməklə yanaşı, beynəlxalq arenada mövqeyimizi bir daha ortaya qoydu. Xüsusilə də, Azərbaycanın dilbər guşəsi olan Laçın şəhərində Laçın Beynəlxalq Hava Limanının açılışının Türkiyə Prezidenti Rəcəb Tayyib Ərdoğanın iştirakı ilə baş tutması bu hadisəni daha da önəmli və unudulmaz edir.
Bu fikirləri deputat Naqif Həmzəyev 28 may tarixində Laçında Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərifin iştirakı ilə keçirilən Türkiyə-Azərbaycan-Pakistan Zirvə görüşü ilə bağlı verdiyi açıqlamasında bildirib. Deputat bu görüşü Azərbaycanın Türkiyə və Pakistanla olan müttəfiqliyinin bariz nümunəsi kimi yüksək qiymətləndirir:
“Azərbaycan Prezidenti Cənab İlham Əliyev, Türkiyə Prezidenti Rəcəb Tayyib Ərdoğan və Pakistanın Baş naziri Şahbaz Şərifin verdiyi mesajlar göstərdi ki, bu əməkdaşlıq təkcə ortaq maraqlara deyil, dərin tarixi köklərə və zamanın sınaqlarından çıxmış sarsılmaz müttəfiqliyə əsaslanır. Hər üç ölkə daim bir-birinin həm çətin günündə, həm də sevincində yanında olub. Bunun tarix boyu bir çox nümunələrini görmüşük.
Bu gün də Yeni dünya düzəninin formalaşmasında hər üç dövlətin birgə addımlamasının çox böyük səbəbləri var. Bu dostluq və qardaşlığı xüsusilə də, Azərbaycanın 44 günlük Vətən müharibəsində əldə etdiyi tarixi qələbədə Türkiyə və Pakistanın qətiyyətli dəstək göstərməsi daha da möhkəmləndirib. Eyni zamanda, Türkiyənin regionda və qlobal miqyasda nüfuz sahibi olması, Pakistanın isə həm böyük dövlət statusu, həm də nüvə gücünə malik olması, bu iki dövləti birləşdirən Azərbaycanın beynəlxalq aləmdə söz sahibi olması üçün əlverişli zəmin yaradıb. Üç ölkənin bir araya gəlməsi və güclərini birləşdirməsi regionda sülh və sabitliyin təmin olunmasında mühüm rol oynayır. Azərbaycan artıq Cənubi Qafqazda lider mövqedədir. Türk Dövlətləri Təşkilatının əldə etdiyi uğurlar da bu üç dövlətin həyata keçirdiyi uğurlu siyasətin nəticəsi kimi qiymətləndirilə bilər”.
Millət Vəkili açıqlamasında Laçında baş tutan Türkiyə-Azərbaycan-Pakistan Zirvə görüşünün strateji və siyasi əhəmiyyətinə toxunaraq, bu tədbirin yalnız rəmzi xarakter daşımadığını, həm də ciddi siyasi mesajlar verdiyini vurğulayıb. Onun sözlərinə görə, Laçında keçirilən bu görüş həm müttəfiqlik ruhunu bölüşən dövlətlər, həm də bu əməkdaşlığa qarşı olan qüvvələr üçün mühüm siqnaldır.
Naqif Həmzəyev sözlərinə görə, Azərbaycanın Qarabağ və Şərqi Zəngəzurda apardığı yenidənqurma işləri, eləcə də keçmiş məcburi köçkünlərin öz yurdlarına qayıtması Prezident İlham Əliyevin verdiyi bütün vədlərə sadiqliyini və ölkəmizin güclü iradə ilə məqsədlərinə çatdığını sübut edir:
“Xüsusilə Laçında bu Zirvə görüşünün keçirilməsi və oradan verilən siyasi mesajlar, həm birlik arzusunda olan dövlətlər, həm də bu əməkdaşlığın əleyhinə çıxan güclər üçün ciddi siqnaldır. Son illərdə Azərbaycanın Qarabağ və Şərqi Zəngəzurda apardığı uğurlu quruculuq işləri, keçmiş məcburi köçkünlərin doğma yurdlarına qayıtması ölkəmizin verdiyi vədlərə sadiq qaldığını və Prezident İlham Əliyevin rəhbərliyi ilə bütün məqsədlərə ardıcıl şəkildə çatıldığını sübut edir.
İki böyük dövlətin liderlərinin Azərbaycana səfəri, Laçında keçirilən Zirvə görüşü hazırda hər üç ölkənin milli maraqlarına cavab verir. Dövlətlərin təhlükəsizliyinin qorunması, gələcəkdə yarana biləcək təhdidlərin qarşısının alınması üçün bu əməkdaşlıq son dərəcə əhəmiyyətlidir. Üç ölkə ortaq gücünü birləşdirərək regionda baş verə biləcək bütün risklərə qarşı birlikdə mübarizə aparmaq niyyətindədir. Bu istiqamətdə atılan addımlar artıq öz nəticəsini verir və daha da verəcək. Məlum və ya qeyri-məlum təhdidlərin qarşısını almaq üçün bu birliyin möhkəmləndirilməsi zəruridir”.
Sonda deputat Zirvə görüşünün keçirilməsi münasibətilə hər üç xalqı təbrik edir, dövlət başçılarına, xüsusilə də Prezident İlham Əliyevə Azərbaycanı təkcə regional deyil, həm qlobal gücə çevirdiyi üçün təşəkkürünü bildirir:
“Fürsətdən istifadə edib, Türkiyə-Azərbaycan-Pakistan Zirvə görüşünün keçirilməsi münasibətilə hər üç xalqı təbrik edir, dövlət başçılarına, xüsusilə də Prezident İlham Əliyevə dərin təşəkkürümü bildirirəm. Bu gün Azərbaycan artıq regional deyil, qlobal gücə çevrilməkdədir. Şükürlər olsun ki, dövlətimiz hər keçən gün daha da qüvvətlənir və qarşıya qoyulan bütün hədəflərə doğru inamla irəliləyir. İnanırıq ki, biz Ali Baş Komandanın rəhbərliyi ilə daha böyük zirvələri fəth edəcək, nailiyyətlərə imza atacağıq”.