Bu gün Azərbaycan dilinin dövlət dili kimi Konstitusiyada təsbit olunmasının 46-cı ildönümüdür. Ulu Öndər Heydər Əliyevin təşəbbüsü ilə 27 aprel 1978-ci ildə qəbul edilmiş Azərbaycan SSR Konstitusiyasına "Azərbaycan SSR-in dövlət dili Azərbaycan dilidir" maddəsi əlavə olunmuşdur.
70-ci illərin ortalarından başlayaraq milli dillərin sıxışdırıldığı bir dövrdə belə cəsarətli addım atmaq böyük vətənpərvərlik və iradə tələb edirdi. Ulu Öndər Heydər Əliyev bütün risklərə baxmayaraq, ana dilimizin qorunması və inkişafı uğrunda ardıcıl mübarizə aparmış, xalqımızın milli kimliyini və mədəni irsini qorumağa nail olmuşdur.
Azərbaycan dilinin dövlət dili statusunu alması gələcək müstəqil Azərbaycan dövlətinin təməl prinsiplərindən birinə çevrildi. Sonrakı illərdə də Heydər Əliyev dil siyasətinin gücləndirilməsi istiqamətində mühüm addımlar atdı. 1995-ci ildə qəbul olunan müstəqil Azərbaycanın Konstitusiyasında da dövlət dili Azərbaycan dili kimi təsbit olundu.
Ümummilli Lider ana dilimizin inkişafı və zənginləşməsi üçün mühüm təşəbbüslərlə çıxış etmiş, "Dövlət dilinin tətbiqi işinin təkmilləşdirilməsi haqqında" fərman imzalamış və Dövlət Dil Komissiyasının yaradılmasına nail olmuşdur. Eyni zamanda 2002-ci ildə "Azərbaycan Respublikasında dövlət dili haqqında" Qanun qəbul edilərək ana dilimizin hüquqi qorunması daha da gücləndirilmişdir.
Ulu Öndər Heydər Əliyevin "Xalqı xalq edən, milləti millət edən onun ana dilidir" kəlamı bu gün də dil siyasətimizin əsas şüarına çevrilmişdir.
Naqif HƏMZƏYEV,
Milli Məclisin deputatı.