Gələcəkdə iki dövlət arasında qarşılıqlı münasibətlərin kəmiyyət və keyfiyyət baxımından dərinləşməsi dünya üçün heç də təəccüblü olmayacaq
Çinin Azərbaycanda yeni təyin olunmuş səfiri Lu Mey qarşılıqlı anlaşmanın dərinləşdirilməsi, dostluq münasibətlərinin möhkəmləndirilməsi və ikitərəfli əməkdaşlığın inkişaf etdirilməsi məqsədilə Azərbaycan cəmiyyətinin bütün təbəqələrinin nümayəndələri ilə əlaqələri fəal şəkildə gücləndirməyə hazır olduğunu bildirib. Səfir Bakıya gəlişi zamanı bildirib ki, 2024-cü ildə dövlət başçıları tərəfindən Çin-Azərbaycan strateji tərəfdaşlığının qurulmasının elan edilməsi ikitərəfli münasibətləri yeni inkişaf mərhələsinə çıxarmağa kömək edib: "Çin və Azərbaycan bir-birinə etibar edən səmimi və mehriban dost, bərabərhüquqlu tərəfdaşlardır. 2000 ildən çox əvvəl Çin və Azərbaycan Böyük İpək Yolu vasitəsilə mədəni mübadilələrə, qarşılıqlı zənginləşmə və öyrənmə prosesinə başlayıb. 1992-ci ildə diplomatik əlaqələr qurulduqdan bəri ikitərəfli münasibətlər sabit şəkildə inkişaf edir. 2024-cü ilin iyul ayında Çin Sədri Si Cinpin və Azərbaycan Prezidenti İlham Əliyev Çin-Azərbaycan strateji tərəfdaşlığının qurulduğunu elan ediblər ki, bu da ikitərəfli münasibətləri yeni inkişaf mərhələsinə çıxarmağa kömək edib". L.Mey vurğulayıb ki, qarşılıqlı dəstək sayəsində Çin və Azərbaycan təkcə ikitərəfli əməkdaşlıqda deyil, həm də qlobal arenada əhəmiyyətli uğurlar əldə ediblər: "Hər iki tərəf bir-birinə ardıcıl surətdə möhkəm dəstək göstərir və siyasi qarşılıqlı etimadı gücləndirir. Biz, həmçinin beynəlxalq arenada sıx əməkdaşlıq edir, birgə daha ədalətli və rasional dünya nizamının formalaşmasını təşviq edirik".
Millət vəkili Naqif Həmzəyev deyib ki, Asiya qitəsi dövlətləri, xüsusilə Çin Xalq Respublikası ilə münasibətlərimiz prioritet istiqamətlərdəndir. Deputatın sözlərinə görə, əsası Ulu Öndər Heydər Əliyev tərəfindən qoyulmuş xarici siyasət konsepsiyası Prezident İlham Əliyevin rəhbərliyi ilə uğurla davam etdirilir:
"Azərbaycan və Çin elə marşrut üzərində yerləşir ki, tarixən bu iki dövlətin yerləşdiyi coğrafi məkan arasında güclü ticarət münasibətləri mövcud olub. Təsadüfi deyil ki, Azərbaycanın müstəqilliyini tanıyan ilk dövlətlərdən biri də 1991-ci ildə məhz Çin olub. Çinlə münasibətlərin inkişafında qarşılıqlı səfərlər, həyata keçirilən layihələr böyük rol oynayıb. Pekini maraqlandıran əsas məsələlərdən biri Çin istehsalı məhsulların Avrasiya məkanında ən qısa marşrutla hərəkətinin və bazarlara çıxışının təmin edilməsidir. Bu mənada həm Azərbaycan, həm də Çin dövlət başçıları münasibətlərin perspektivindən inamlı şəkildə bəhs edərkən, iki ölkə arasında nəqliyyat-logistika, iqtisadi-enerji baxımdan həyata keçiriləcək layihələrin siqnalını da verirlər".
Parlament üzvü vurğulayıb ki, Azərbaycan-Çin münasibətlərinin mühüm inkişaf tendensiyalarından biri öz növbəsində enerji, elektroenergetika sektorunda da özünü göstərir:
"Bu kontekstdə Çinə məxsus enerji şirkətləri enerji sektoruna xüsusi maraq göstərir. Çinin iqtisadi, hərbi, texnologiya, eləcə də siyasi nailiyyətlərinə qarşı həzmsizlik nümayiş etdirən Qərb xüsusilə də Tayvan məsələsi üzərindən Çinə qarşı həmlələr axtarışındadır. Lakin Çin “Bir kəmər, bir yol” kimi layihələrlə olduqca prolifik geopolitik məkan formalaşdıraraq, yol üzərində yerləşən dövlətlərin iqtisadi və ticarət baxımından inkişafına şərait yaradacaq modeli dəstəkləyir. Azərbaycan bu yol üzərində yerləşməklə, Çin üçün çox böyük əhəmiyyətə sahib Xəzər hövzəsi dövlətidir. Bu mənada, gələcəkdə iki dövlət arasında qarşılıqlı münasibətlərin kəmiyyət və keyfiyyət baxımından dərinləşməsi dünya üçün heç də təəccüblü olmayacaq”.