“7-ci ADA Siyasi Forumu, Azərbaycanın beynəlxalq siyasət və diplomatiya sahəsindəki mövqeyini gücləndirmək üçün mühüm bir platformadır. ADA Universiteti və Beynəlxalq Münasibətlərin Təhlili Mərkəzinin birgə təşkilatçılığı ilə keçirilən bu tədbir, qlobal problemlərin müzakirəsi və həll yollarının axtarışı üçün beynəlxalq ekspertləri və düşüncə mərkəzlərinin nümayəndələrini bir araya gətirir. Forumun bu ilki mövzusu "Yeni dünya nizamına doğru" adlanır və qlobal geosiyasi dəyişikliklər, iqtisadi transformasiya və rəqəmsal inqilabın təsirləri kimi aktual məsələlərə həsr olunub. Tədbirdə 44 ölkədən 80-dən çox beynəlxalq ekspert və nümayəndə iştirak edir ki, bu da onun əhəmiyyətini daha da artırır”.
Bunu açıqlamasında Milli Məclisin deputatı Naqif Həmzəyev deyib.
Deputatın bildirdiyinə görə, bu forumun əhəmiyyəti həm də Azərbaycanın beynəlxalq arenada dialoq və əməkdaşlıq üçün mühüm bir mərkəz kimi tanınmasında özünü göstərir: “Forum Azərbaycanın qlobal problemlərin həllində fəal iştirakını və beynəlxalq tərəfdaşlıqlarını gücləndirmək üçün bir vasitədir. Eyni zamanda, bu cür tədbirlər ölkənin intellektual potensialını nümayiş etdirir və gənc nəsillər üçün ilham mənbəyi olur”.
N.Həmzəyev Prezident İlham Əliyevin beynəlxalq forumda çıxış edərək bir sıra mühüm məsələlərə toxunduğunu vurğulayıb: “Cənab Prezident Azərbaycanın Cənubi Qafqazın aparıcı ölkəsi olduğunu vurğuladı və ölkənin Qoşulmama Hərəkatındakı güclü mövqeyini, Mərkəzi Asiya ilə yaxşı əlaqələrini qeyd etdi. Prezident Azərbaycanın iqtisadi baxımdan güclü, enerji resurslarına malik və ordusunun döyüş meydanında sübut etdiyi gücü ilə fərqləndiyini bildirdi. O, Azərbaycanın ABŞ üçün mühüm tərəfdaş ola biləcəyini və bu əməkdaşlığın bölgə üçün vacib olduğunu ifadə etdi”.
Deputat əlavə edib ki, Prezident İlham Əliyev forumda Cənubi Qafqaz və regional layihələrə dair vacib fikirlər səsləndirdi: “Dövlət başçısı Azərbaycanın regionda əsas rol oynadığını vurğuladı və bəzi qüvvələrin Cənubi Qafqazda ayırıcı xətlər çəkmək cəhdlərinin uğursuz olacağını bildirdi. Prezident həmçinin Azərbaycanın strateji tərəfdaşlıq sazişləri vasitəsilə Mərkəzi Asiya və Avropa arasında əlaqələri gücləndirdiyini qeyd etdi. Bu çıxış Azərbaycanın regional əməkdaşlıq və inkişafda oynadığı mühüm rolu bir daha təsdiqləyir”.