“Azərbaycan torpaqlarını işğaldan azad etdikdən sonra keçmiş məcburi köçkünlərin öz dədə-baba torpaqlarına qayıdışını təmin etmək üçün xüsusi dövlət proqramı həyata keçirilir”. Bunu açıqlamasında Milli Məclisin deputatı Naqif Həmzəyev deyib.
Deputat bildirib ki, artıq keçmiş məcburi köçkünlər mərhələli şəkildə öz doğma torpaqlarına köçürülür: "Bir sözlə, “Böyük Qayıdış” dövlət proqramı uğurla həyata keçirilir. Təbii ki soydaşlarımızın öz dədə-baba torpaqlarına qayıtması ilə iş bitmir, orada olan şəhər, kənd, qəsəbələrin dövrün tələblərinə uyğun müasir avadanlıqlarla hazırlanması ilə yanaşı, əhalinin məşğulluq problemi, sosial həyatının təşkil edilməsi vacib məsələlər sırasındadır. Bu ağır işin öhdəsindən Azərbaycan hökuməti layiqincə gəlir. Qurulmuş yeni kənd, şəhər və qəsəbələr ağıllı sistemlər əsasında formalaşır. Bütün ərazilər “yaşıl ərazi” elan edilib.
Füzuli, Cəbrayıl, Laçın, Şuşa, Xankəndi, Xocalıda köçə şahidlik etdik və bu ildən etibarən Kəlbəcərdə də köçə şahidlik edəcəyik.
Bir sözlə, ən qısa zamanda işğaldan azad edilmiş ərazilərdə həyat yenidən canlanacaq, keçmiş məcburi köçkünlər öz dədə-baba yurdlarında yeni həyatlarına başlayacaq.
İnanırıq ki, işğaldan azad edilmiş ərazilərimiz qısa zaman ərzində Azərbaycan iqtisadiyyatına birləşdiriləcək. Azərbaycan Respublikası tərəfindən qoyulan yatırımlar işğaldan azad olunmuş ərazilərin iqtisadiyyatının dirçəlməsinə gətirib çıxaracaq. Dirçəlmiş ərazilərin iqtisadiyyatı ümumi Azərbaycan iqtisadiyyatına öz töhfəsini verəcək. Yaxın gələcəkdə yalnız keçmiş məcburi köçkünlər deyil, eyni zamanda ümumi Azərbaycan vətəndaşları, xüsusilə, gənclər bu ərazilərdə işləyəcək, özlərinə həyat quracaq. Bir sözlə, biz “Böyük Qayıdış”ın növbəti mərhələlərinə şahidlik edəcəyik".