Zaman-zaman ölkə gündəminə çevrilən bir məsələ də, təəssüf ki, problemli mülk məsələləridir.
Daha dəqiq, tikinti şirkətləri ilə mülk sahibləri arasında baş verən anlaşılmazlıqlar həllini tapmamaqda davam edir.
Belə demək olarsa, tikinti şirkətləri sakinlərlə razılığa gəlmədikləri halda, sözün əsl mənasında onların yaşadıqları evi başlarına uçururlar.
Əvvəllər, məsələn, ev yiyəsi evinə gələndə hər şeyi dağılmış halda görsə də, indi buna da ehtiyac yoxdur.
Artıq ev sakinləri evdə olduqları halda da söküntü işləri apara bilirlər.
Yasamal rayonunda “Melissa Group”un həyat keçirdiyi iş də bu qəbildəndir.
Milli Məclisin İnsan hüquqları komitəsinin üzvü Naqif Həmzəyev bildirib ki, hazırda MTK-lar və sakinlər arasınd ciddi problemlər var:
“Əsas səbəblərindən biri budur ki, bəzi MTK-lar kifayət qədər vəsaitləri olmadığı halda hansısa ərazidə bina tikmək cəhdi göstərir, vətəndaşlara heç bir vəsait ödəmədən ərazidə bina tikmək, həmin vətəndaşları tikiləcək yeni binada mənzillərlə təmin etmək öhdəliyini götürürlər”.
Onun sözlərinə görə, bina tikiləcəyi müddət ərzində onların kirayə xərclərini ödəyəcəklərini deyirlər.
“MTK-lar tikinti prosesində ciddi maliyyə problemləri ilə üzləşirlər. Nəticədə sökdükləri binanı vaxtında tikib təhvil verə bilmirlər. Belə olan halda isə sakinlər uzun müddət kirayə qalmağa məcbur olurlar. Bu müddət ərzində həm sakinlərin kirayə pulunu ödəmək, həm də onları razı salmaq ciddi problemə çevrilir.Burada da hər iki tərəf arasında narazılıq yaranır. Bəzən MTK-lar hansı ərazidə bina tikmək istəyirlərsə, orada bir neçə sakinin razılığını alsalar da, digərləri ilə razılaşa bilmirlər, çünki ödəniləcək məbləğ, veriləcək evin kvadratı sakinləri qane etmir. Hər iki tərəfin haqlı olduğu məsələlər var”.
Naqif Həmzəyev bildirir ki, bəzi sakinlər də bəzən kiçik kvadratlı evlərdə çox sayda sakin qeydiyyata salır və onlar daha çox vəsait əldə etmək istəyirlər. MTK isə standart qaydalar çərçivəsində həmin sakinlərə ödəniş edirlər. Bu baxımdan bir ərazidə 50 evdən 40-ı ilə razılıq əldə olunsa da, 10 evi razı salmaları mümkün olmur.
Deputat bildirir ki, bu problemlərin həllinə dair konkret qaydalar müəyyənləşdirilməlidir:
“İlk növbədə MTK-lar maksimum dərəcədə çalışmalıdırlar ki, sakinləri razı salsınlar. İkincisi, kirayə evlərin pulunun ödənişi müqaviləyə əsasən iki ildirsə, əvvəlcədən tam olaraq məbləğ iki illik ödənilməlidir. Hər ay ödəniş məsələsi dayandırılmalıdır. Onlar MTK ofislərinin qarşısında bəzən üç-dörd gün vaxt keçirirlər ki, aylıq ödənişi ala bilsinlər. Bir müddət sonra ev sahibləri kirayəçiləri evdən çıxarırlar. Sonra da kirayə mənzil tapmaq çətin olur. Çünki mütəmadi olaraq kirayə qiymətləri bahalaşır”.
Deputat sakinlərin qaraj məsələsinə də toxunub:
“Bəzi sakinlərin qarajları var, onlar köhnə evlərində avtomobillərini park etməklə bağlı heç bir problem yaşamırlar. Ancaq yeni binalar tikilən zaman vətəndaşların məhz qarajlarla təmin edilməsi məsələsində də çox ciddi narazılıq yaranır. MTK-lar binanın zirzəmisini sakinlərə vermirlər, hətta bəzən ev qiymətinə satmağa cəhd edirlər. Nəticədə, sakinlərlə yanaşı şəhərdə də parklanma ilə bağlı əlavə problemlər ortaya çıxır. MTK-lar binada mənzil satırlarsa, mütləq həmin mənzili ən az bir avtomobil saxlamaq üçün qarajla təmin etməlidirlər. MTK-lar məmurları da öz arxalarına alaraq sakinlərə problem yaşatmamalıdırlar”.
Xatırladaq ki, Yasamal rayonu, Birinci Alatava massivi , Abdulvahab Salamzadə küçəsi 118B ünvanında sakinlər içəridə ola-ola söküntü işləri aparıb.
Söküntü zamanı yaşayış olan evlər ekskavator vasitəsilə dağıdılıb. Hadisə nəticəsində ev sakinlərindən xəsarət alanlar olub. Dövlət Şəhərsalma və Arxitektura Komitəsinin yaydığı məlumata görə, söküntü işləri müvafiq icazə olmadan aparılıb:
“Aparılan işlər vətəndaşlarla tam razılıq əldə edilmədən və mövcud qanunvericiliyin tələblərinə zidd aparıldığı üçün Baş İdarə tərəfindən aidiyyəti qurumlarla birlikdə dayandırılıb və aktlaşdırılıb. Qanunsuz işlər zamanı vətəndaşların mülklərinə dəymiş ziyanla bağlı müvafiq araşdırma aparılması üçün materiallar hüquq-mühafizə orqanlarına təqdim ediləcək”. Faktla bağlı söküntü işləri aparan şirkətin iş icraçısı və ekskavator sürücüsü saxlanılıb, cinayət işi açılıb.