"Gəncədə birinci problem yeni iş yerlərinin yaradılmamasıdır"
Bunu Milli Məclisin Gəncədən seçilən deputatı Naqif Həmzəyev bildirib.
"Gəncədə birinci problem yeni iş yerlərinin yaradılmamasıdır. Yeni iş yerləri olmadığına görə də, xüsusən, gənclərin məşğulluq problemi öz həllini tapmır. Qınamıram, yaşlı nəsil də iş yerlərini itirmək istəmir. Bu baxımdan yeni iş yerləri yaranmır. Buna görə də Gəncənin bilikli, savadlı gəncləri Bakı və başqa yerlərə üz tuturlar. Ona görə də Gəncənin gənc, savadlı kadrlarını, düşünən beyinlərini itiririk. Bu gün Gəncədə beyin köçü var. Bu da yaxşı hal deyil. Gəncədə əhali arasında yaşlanma gedir. Qeydiyyatı Gəncədə olsa da, gənclərin əksəriyyəti burada yaşamır. Xüsusilə sosial həyat yoxdur. Dövlət tərəfindən filarmoniya, teatr, mədəniyyət ocaqlarının yaradılmasına baxmayaraq, bu ocaqlar öz missiyalarını təəssüflər olsun ki, yerinə yetirə bilmirlər. Bakıda geniş seçim imkanları var. Onu biz yarada bilmirik. Gənclər üçün əyləncə mərkəzləri yoxdur. Gənclərin məşğulluq problemlərini həll etməli, sahibkarların gəlişini təmin etməliyik. Təbliğatlar etməliyik ki, sahibkarlar, gənc iş adamları, yaxud böyük şirkətlər gəlib öz filiallarını, bazarlarını yaratsınlar. Beləliklə də iş yerləri olsun, ancaq bu proses yoxdur".
Deputat Naqif Həmzəyev daha sonra gənclərin digər problemindən danışıb.
"İkinci məsələ gənc ailələrin ev sahibi ola bilməmələridir. Gəncədə çoxlu sayda ev tikilmir. İpoteka imkanları da çox deyil. Sosial evlərin sayı da çox deyil. Ona görə də düşünürəm ki, Gəncə şəhərində sosial evlərin tikintisinə geniş yer ayırmalıdır ki, Qərbdə Gəncə şəhəri bufer rolunu oynasın. Yəni Qazaxdan, Şəmkirdən, Gədəbəydən, Goranboydan yetişən gənclər şəhər deyəndə Gəncəyə gəlsinlər, Bakıya getməsinlər. Əks təqdirdə, Bakıda əhalinin sayı artır, digər şəhərlərdə əhalinin sayı azalır. Sumqayıt şəhəri əhalisinin sayı niyə Gəncəni ötdü. Çünki şəhər Bakıya yaxındır. Bakının hesabına Sumqayıt şəhəri inkişaf etdi. Amma düşünürəm ki, Gəncəni 1 milyonluq şəhərə çevirməliyik ki, artıq Gəncə də yaxşı mənada Bakıya rəqib olsun. Biz Bakını təkləşdirməməliyik, tək Bakını inkişaf etdirməməliyik, Gəncə, Lənkəran, Naxçıvan, Xankəndi şəhərləri də inkişaf etməlidir. Gənclər Gəncəni sürətli şəkildə tərk edirlər və demoqrafik problem yaranır. Bu problemi indidən görüb həll etməliyik əks halda sonra çox əziyyət çəkəcəyik" - deyə deputat Naqif Həmzəyev deyib.