“Prezident İlham Əliyev Yunanıstanın səfirinə ölkəsi ilə bağlı bütün tənqidi düşüncələrini olduqca açıq söylədi. O, bir daha nümayiş etdirdi ki, Azərbaycanın milli maraqları ən vacib məsələdir, burada qapalı və qaranlıq heç bir məqam ola bilməz”. İlham Əliyevin Yunanıstanın ölkəmizdəki yeni səfiri Nikolaos Piperiqkosun etimadnaməsini qəbul edərkən Türkiyəyə dəstəklə bağlı söylədiyi fikirləri CBC-yə şərh edən siyasi ekspertlər belə deyiblər. Dövlət başçısının Şərqi Aralıq dənizi mövzusunda Türkiyənin mövqeyini qəti şəkildə dəstəkləməsi rəğbətlə qarşılanıb.
Ekspertlərin sözlərinə görə, ölkə başçısı bir daha göstərdi ki, Azərbaycan bütün beynəlxalq platformalarda Türkiyənin yanındadır və onu qətiyyətlə dəstəkləyir.
Azərbaycan prezidentinin Türkiyəyə dəstəklə bağlı söylədiyi fikirlər qardaş ölkədə geniş əks-səda doğurub. Türkiyənin yüksək səviyyəli rəsmiləri dövlət başçısına bu dəstəyə görə minnətdarlıq ediblər. Türkiyəli politoloq, professor Kürşad Zorlu CBC-yə müsahibəsində Azərbaycan və Türkiyəni sıx qardaşlıq və dostluq əlaqələrinin birləşdirdiyini xatırladıb. İlham Əliyevin səsləndirdiyi fikirlərdən çox məmnun olduqlarını deyib.
Politoloq Türkiyənin istənilən məsələdə Azərbaycanın yanında olduğunu deyib. Eləcə də, iki ölkə arasında həyata keçirilən layihələrin əhəmiyyətini xüsusi qeyd edib.
Azərbaycan prezidentinin Yunanıstanın Azərbaycandakı yeni səfiri ilə söhbət zamanı Türkiyəyə dəstəklə bağlı söylədiyi fikirlər qardaş ölkənin kütləvi informasiya vasitələrinin manşet xəbərinə çevrilib. Bu ölkənin Anadolu və İhlas agentlikləri, TRT HABER, CNN TÜRK, A HABER, TGRT HABER televiziya kanalları, eləcə “Milliyet”, “Hürriyet”, “Sözcu”, “Takvim”, “Star” və digər qəzetləri bu barədə geniş xəbərlər yayıblar. Həmçinin sosial media istifadəçiləri Azərbaycan prezidentinin fikirlərini paylaşaraq təşəkkür ediblər.