“Ermənistan və Azərbaycan şərti sərhədlərində erməni silahlı qüvvələri tərəfindən törədilən təxribatların əsas səbəbi Avropa İttifaqı "müşahidə missiyası"nın fəaliyyətinin davam etdirilməsinin "zərurətini" ortaya qoymaq cəhdləridir”.
Bunu deputat Naqif Həmzəyev Azərbaycan Ordusunun mövqelərinini atəşə tutulmasına münasibət bildirərkən deyib.
Onun sözlərinə görə, faktiki olaraq Ermənistan tərəfi bilir ki, şərti sərhədlərdə hər hansı təxribat və ya qarşıdurma olmayacağı təqdirdə Aİ-nin "müşahidə missiyası"nın hesabatına yazmağa heç nə olmayacaq:
"Məhz Aİ missiyasının öz fəaliyyətini davam etdirməsini, Ermənistan ərazisində daha çox qalmasını rəsmiləşdirmək üçün süni təxribalara, gərginliklərə ehtiyac var. İstənilən halda, Ermənistan tərəfi bu günə qədər törətdiyi bütün təxribatlara görə məsuliyyət daşıyır və mütləq cavabını alacaq. Əgər təxribatlar Azərbaycana təhdid doğurarsa, təbii ki, lazımi tədbirlər tərəddüd etmədən görüləcək. Məsələ ondadır ki, Ermənistanı silahlandıran, onları cəsarətləndirən beynəlxalq güclər, İrəvanın havadarı olan dövlətlər də bu cür təxribatların törədilməsində maraqlıdırlar. Onlar Cənubi Qafqazda sülhün əldə olunmasını istəmirlər. Elə bu səbəbdən Ermənistanı süni şəkildə silahlandırır, Azərbaycanla aktiv münaqişəyə hazırlayırlar. Ermənistan hökuməti sülh açıqlamalarında səmimidirsə, o zaman atəşkəsin pozulması hallarını dərhal araşdırmalı, buna yol verənləri cəzalandırmalıdır. Qalib Azərbaycanla güc və təhdid dilə danışmaq faydasızdır və heç bir mənası yoxdur. Azərbaycanın irəli sürdüyü 5 baza prinsipi əsasında sülh sənədinin imzalanmasının vaxtı çoxdan çatıb".
Naqif Həmzəyev: Qalib Azərbaycanla güc və təhdid dilə danışmaq faydasızdır və heç bir mənası yoxdur
Deputat vurğulayıb ki, Ermənistan tərəfi Avropa İttifaqının "müşahidə missiyası"nın fəaliyyətini dayandırmalı, Azərbaycana qarşı ərazi iddialarından tamamilə əl çəkməli, ATƏT-in Minsk qrupunun fəaliyyətinin dayandırılması ilə bağlı rəsmi mövqe ortaya qoymalıdır:
"Zəngəzur dəhlizinin açılmasına maneçilik törətməməlidir. Qərbi azərbaycanlıların öz dədə-baba torpaqlarına qayıtmaq və orada yaşamaq hüquqları bərpa edilməlidir. Ermənistan öz öhdəlikləri yerinə yetirməlidir ki, qısa zamanda sülhün əldə olunması mümkün olsun. Əks təqdirdə hər ötən gün Ermənistanın əleyhinə işləyir və bu cür təxribatlar Ermənistana baha başa gələ bilər. Daxili auditoriya və beynəlxalq ictimaiyyətə hesablanmış açıqlamalar nəticə etibarilə Ermənistanın qeyri-səmimi olduğunu ortaya qoymaqdadır".