Beynəlxalq güclərin xüsusi planları görünür
Paşinyan öz kommunikasiya layihəsini də ortalığa ataraq, Zəngəzur dəhlizinə alternativ axtarır və bunu sülh danışıqları fonunda edir
Ermənistanın Baş naziri Nikol Paşinyan Konstitusiyanın preambulasında müstəqillik bəyannaməsinə istinadın dəyişdirilməsi üçün ölkə qanunvericiliyinə dəyişiklik edilməsi ilə bağlı referenduma təklif verməyi planlaşdırır. Əvəzində onun müəllifi olduğu “Real Ermənistan” layihəsindən istifadə olunacaq. “Hraparak”ın yaydığı məlumata görə, Paşinyan təşəbbüsə geniş siyasi dəstək olmasa belə, bu planı həyata keçirmək əzmindədir. Qeyd edək ki, 2024-cü ilin sentyabrında Paşinyan Azərbaycanla sülh müqaviləsi bağlamaq üçün Ermənistan Konstitusiyasının dəyişdirilməsinin mümkünlüyünü bəyan edib. “Joxovurd” qəzeti də yazıb ki, Nikol Paşinyan Mülki Müqavilənin nümayəndələri ilə qapalı görüşdə Ermənistanla Azərbaycan arasında münasibətlərdə nə gözlənildiyini müzakirə edib. Məlumata görə, görüş fevralın 26-da respublika parlamentində baş tutub və iki saata yaxın davam edib: “Paşinyan bu dəfə gərgin olmayıb, əsasən tələsməməyə və mümkünsə, Azərbaycanın təkliflərini uzun müddət müzakirə edib sonra cavab verməyə çağırıb. Baş nazir onu da qeyd edib ki, hazırda hər hansı eskalasiya təhlükəsi yoxdur. Qapalı görüşdən sonra Paşinyan həmsöhbətlərinin heç bir sualına dəqiq cavab verməyib və onlarda belə təəssürat yaranıb ki, baş nazir onlara güvənmir, əsasən ictimai şəkildə dediklərini onlarla paylaşır”.
Millət vəkili Naqif Həmzəyev deyib ki, Ermənistanın Baş naziri Nikol Paşinyanın vaxt qazanmaq məqsədilə tamamilə fərqli mövzuları gündəmə gətirməsi diqqət çəkir. Deputatın sözlərinə görə, Ermənistanın məğlub duruma düşməsindən, kapitulyasiya aktının imzalanmasından ötən 4 ildən çox zaman ərzində öz öhdəlikləri yerinə yetirməməsi birbaşa Paşinyanın vaxt udmasına hesablanıb:
"Ermənistan hökuməti danışıqlar prosesini öz xeyrinə dəyişmək, daha əlverişli şərtlər altında sülh sənədinin imzalanmasına nail olmaq niyyətindədir. Hadisələrdən düzgün nəticə çıxarmayan Ermənistan öz havadarlarının birbaşa dəstəyi ilə aktiv şəkildə silahlanır. İlk zamanlarda silahlanmanın müdafiə məqsədi daşıdığını iddia etsələr də, sonralar hücum xarakterli hərbi texnikalar almağa başladılar. Paşinyan "silahlara qarşılıqlı nəzarətdən" danışır. Məğlub bir ölkənin qalib dövlət qarşısında belə bir tələb irəli sürməsi absurddur. Azərbaycan yalnız Ermənistana görə öz ordusunu gücləndirmir. Ümumiyyətlə, regionun aparıcı gücü sayılan Azərbaycan öz mövqeyini qoruyub saxlamaq məqsədilə daim ordusunun qüdrətli olmasına çalışır. Bu, Azərbaycan üçün çox vacibdir, zəruridir. Xüsusilə, Azərbaycan enerji resurslarını dünya bazarlarına çıxaran bir ölkədir. Bu baxımdan Azərbaycanın güclü olması, söz sahibinə çevrilməsi olduqca vacibdir. 30 ilə yaxın Azərbaycan torpaqlarını işğal altında saxlayan təcavüzkar Ermənistanın aktiv şəkildə silahlanması çox təhlükəlidir. Ermənistanın faktiki olaraq təcavüzkar siyasət yeritməsinə, hərbi cinayətlər törətməsinə dünya ictimaiyyəti də şahidlik edib".
Parlament üzvü hesab edir ki, Ermənistan səmimi sülh istəyini sübuta yetirmək üçün ilk növbədə öz Konstitusiyasında Azərbaycana qarşı ərazi iddialarından vaz keçməlidir:
"Paşinyan nə üçün prosesi 2026-cı ilə qədər uzatmaq istəyir? Niyə Azərbaycanın haqlı tələblərini gözardı edərək, sülh müqaviləsinin iki əsas razılaşdırılmayan bəndini icra etməkdən boyun qaçırır? Bu o deməkdir ki, Ermənistan siyasi rəhbərliyi sülh danışıqlarında qeyri-səmimidir. Sülh mətni üzərində önəmsiz redaktələr edərək prosesi uzadırlar. Nəqliyyat və kommunikasiyaların açılması ilə əlaqədar bəndlərin sülh danışıqlarından çıxarılması təklifi Azərbaycan tərəfindən edilib. Məqsəd o olub ki, sülh prosesi sürətlənsin. Paşinyan öz kommunikasiya layihəsini də ortalığa ataraq, Zəngəzur dəhlizinə alternativ axtarır və bunu sülh danışıqları fonunda edir. İrəvan hökumətinin başındakı şəxs anlamalıdır ki, hər ötən gün Ermənistanın əleyhinə işləyir. Ermənistan Azərbaycanın irəli sürdüyü əsas tələblər və mövcud 5 baza prinsipi əsasında sülh müqaviləsini ən qısa zamanda imzalamalıdır. Ən əsası da üzərinə götürdükləri öhdəlikləri yerinə yetirməlidir. Şərti sərhədlərdə legitim olmayan "müşahidə" missiyası həyata keçirən Avropa İttifaqının nümayəndələrinin fəaliyyətinə son verilməlidir. Aktiv silahlanma dayanmalıdır. Nəzərə alaq ki, beynəlxalq güclərin Ermənistanla bağlı xüsusi planları var. Təhlükəli oyunlara alət olan Ermənistan özü ilə yanaşı, regionu da risk altına atır. Azərbaycan buna göz yuma bilməz. Nikol Paşinyan Ermənistanın müstəqilliyinin daimi olmasını istəyirsə, Azərbaycan və Türkiyə ilə münasibətləri normallaşdırmalıdır".