“Azərbaycan və Çin münasibətləri növbəti onillikdə artan xətt üzrə inkişaf edəcək”.
Bunu prezident İlham Əliyevin Çinin CGTN telekanalına verdiyi müsahibədə səsləndirdiyi fikirlər barədə danışan Milli Məclisin deputatı Naqif Həmzəyev açıqlamasında deyib.
Onun sözlərinə görə, Azərbaycan şaxəli və balanslı carici siyasət həyata keçirməkdə maraqlı olan ölkədir:
“Bunu reallaşdırdığı münasibətlərlə dəfələrlə isbat edib. Çin də Azərbaycanın sıx əməkdaşlıq etdiyi ölkələrdən biridir. Məhz strateji tərəfdaşlıq sazişinin imzalanması Bakı və Pekin arasında maraqların üst-üstə düşdüyünün göstəricisidir. Hər iki tərəfin üzərində çalışdığı Orta Dəhlizin inkişaf etdirilməsi və Zəngəzur dəhlizinin reallaşması Avropadan Çinə yük daşımalarının ən sürətli şəkildə çatmasını təmin edəcək. Bu səbəbdən Azərbaycan və Çin münasibətləri növbəti onillikdə artan xətt üzrə inkişaf edəcək.
Yanaşı olaraq bir sıra Avropa ölkələri ilə də strateji tərəfdaşlıq sənədi mövcuddur. Bu gün Azərbaycan qazı Avropa bazarında tələbatı ödəməyə xidmət edir və enerji təhlükəsizliyində mühüm rol oynayır. Əlavə olaraq qardaş Türkiyə, Rusiya, Özbəkistanla da strateji müttəfiqlik sənədi imzalamışıq. Bir sözlə, bütün bu amillər Azərbaycanın balanslı və şaxəli xarici siyasətindən xəbər verir.
Çox təəssüflər olsun ki, Bayden hakimiyyəti zamanı ABŞ-nin Azərbaycana qarşı qərəzli siyasəti münasibətlərin soyumasına səbəb oldu. Ancaq prezident İlham Əliyev əmin idi ki, Donald Tramp qalib gələcək və iki ölkə arasında münasibətlərdə yenidən yaxınlaşma müşahidə olunacaq. Elə də oldu. İnanırıq ki, indidən sonra münasibətlər çox yaxşı səviyyədə davam etdiriləcək”.