YAP Gəncə şəhər təşkilatı Gənclər Birliyinin təşkilatçılığı ilə “Vətənpərvərlik milli-mənəvi dəyərimizdir” adlı onlayn videokonfrans keçirilib. Gənclərində vətənpərvərlik hissinin aşılanması məqsədilə keçirilən konfransda YAP Gəncə şəhər təşkilatının sədri, Milli Məclisin deputatı Naqif Həmzəyev, Elm üzrə Prezident mükafatçısı, YAP Gəncə şəhər təşkilatının sədr müavini, tədqiqatçı-alim Elnur Həsənov və 100-ə yaxın fəal gənclər iştirak edib.
Millət vəkili Naqif Həmzəyev videokonfransda gənc nəslin vətənpərvərlik ruhunda tərbiyə olunmasının aktuallığından danışıb, gənclərə vətənpərvərlik hissinin aşılanmasının hər bir xalqın sabahını təmin edən amillərdən olduğu qeyd edib. Millət vəkili xüsusi ilə vurğulayıb ki, ölkəmizdə gənclərin bu istiqamətdə tərbiyə olunmasına Ümummilli lider Heydər Əliyevin respublikaya rəhbərlik etdiyi ilk dövrlərdən başlanılıb. Ulu öndər gənclərin himayədarları kimi çıxış edərək sağlam düşüncəli yeni nəslin yetişdirilməsi sahəsində misilsiz işlər görüb. Bu gün Ümummilli liderin layiqli davamçısı ölkə Prezidenti İlham Əliyev tərəfindən gənclər siyasəti uğurla həyata keçirilir. Məhz bu siyasət sayəsində ölkəmizdə Vətənini sevən, hər zaman onun tərəqqisinə çalışan gənclər ordusu formalaşıb.
Millət vəkili gənclərimizin dünyanı ağuşuna alan “gözəgörünməz bəla” ilə mübarizədə fəallıq göstərdiklərinə diqqət çəkərək qeyd edib ki, belə bir çətin dönəmdə, pandemiya şəraitində gənclərimiz birlik və həmrəylik nümayiş etdirdilər. Son günlərdə işğalçı Ermənistan dövləti tərəfindən Tovuz istiqamətində baş verən hadisələr isə Azərbaycan gənclərinin milli-mənəvi ruhda yetişdiyini göstərdi. Gənc nəcil bir daha sübut etdi ki, onlar öz Prezidentlərinin- cənab İlham Əliyevin ətrafında sıx birləşib və işğal altında olan torpaqlarımızı mənfur düşməndən azad etməyə hər an hazırdırlar.
Çıxışının sonunda Naqif Həmzəyev gəncləri sosial şəbəkələrdə milli-mənəvi dəyərlərimizin, tarixi abidələrimizin təbliği, vətənpərvərliklə bağlı paylaşımlarda fəal olmağa səslədi.
Elnur Həsənov gənc nəslin Vətəninə, doğma Azərbaycana bağlı olmasından danışıb:” Gənclərimizin nümayiş etdirdikləri vətənpərvərlik nümunələri tədqirəlayiqdir və bu da gənclərimizin monolitliyinin, Ali Baş Komandanın ətrafında sıx birləşməsinin, mübarizliyinin və vətənpərvərliyinin təsdiqidir.”
Canlı yayımlanan konfransa qoşulan gənclər Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılmasında fəallıq göstərdiklərni qeyd edib, ulu öndər Heydər Əliyevin şah əsəri olan Azərbaycanın tərəqqisi, müstəqilliyimizin möhkəmləndirilməsi, işğal altında qalan torpaqlarımızın azad olunması üçün Prezident İlham Əliyevin ətrafında sıx birləşərək, Ali Baş Komandanın “İrəli!” əmrinə hər an hazır olduqlarını bildiriblər. Sonda gəncləri maraqlandıran suallar millət vəkili Naqif Həmzəyev tərəfindən ətraflı cavablandırılıb