YAP Sabunçu Rayon Təşkilatı və Bakı Gənclər Mərkəzinin birgə təşkilatçılığı ilə Ümummilli lider Heydər Əliyevin Anım gününə həsr olunmuş “Heydər Əliyevin gənclərə örnək siyasi kursu” adlı layihənin açılış mərasimi keçirilib.
Layihənin keçirilmə məqsədi Ulu Öndər Heydər Əliyevin zəngin siyasi irsinin gənclərə öyrədilməsi və gənclərin ölkənin sosial, iqtisadi və siyasi həyatında fəal iştiraka təşviq edilməsi, Azərbaycan dövlətçiliyinin möhkəmlənməsi və inkişafı sahəsində müasir Azərbaycan gəncliyinə inkişaf, bilik və vətənpərvərlik kimi ali dəyərlərin aşılanmasıdır.
Əvvəlcə qonaqlar Bakı Gənclər Mərkəzində yaradılan Heydər Əliyev muzeyi ilə tanış olublar.
Tədbiri giriş nitqi ilə açan YAP Sabunçu rayon təşkilatının sədri Araz Xudadanov və Bakı Gənclər Mərkəzinin direktoru Nərgiz Babayeva gəncləri salamlayaraq bu kursun əhəmiyyətindən bəhs edib və onlara uğurlar arzulayıblar.
Üç günü əhatə edəcək siyasi kursun ilk məruzəçiləri Yeni Azərbaycan Partiyası Veteranlar Şurasının üzvü, "Modern ailə və inkişaf" ictimai birliyinin sədri Zərifə Quliyeva və Yeni Azərbaycan Partiyası Təftiş Komissiyasının üzvü, Milli Məclisinin deputatı Naqif Həmzəyev olmuşdur. “Heydər Əliyev: Zaman, şəxsiyyət və əbədiyyət faktoru” və “Heydər Əliyev və gənclər siyasəti” mövzularında çıxış edən məruzəçilər sonda gənclərin suallarını cavablandırıblar.
Qeyd edək ki, siyasi kursda Dövlət Gömrük Komitəsinin Akademiyasının, Azərbaycan Respublikası Prezidenti yanında Dövlət İdarəçilik Akademiyasının, Milli Aviasiya Akademiyasının və Xəzər Universitetinin tələbələri iştirak ediblər.
