“Fransanın birbaşa diktəsi ilə Beynəlxalq Frankofoniya Təşkilatının Azərbaycanı etnik təmizləmədə ittiham edən sənəd qəbul etməsi birbaşa qərəzdir”.
Bunu deputat Naqif Həmzəyev Beynəlxalq Frankofoniya Təşkilatının Azərbaycanı “etnik təmizləmə”də ittiham edən qətnaməsinə münasibən bildirərəkən deyib.
Deputatın sözlərinə görə, bunun heç bir hüquqi əsası yoxdur və faktiki olaraq şər-böhtan əsasında formalaşdırılmış bir sənəddir. Həmzəyev bildirib ki, sənədin qəbul olunmasında fransızların diktəsi, istəyi olsa da, Ermənistan tərəfi bu sənədin qəbulunda faktiki olaraq yaxından iştirak edib. Bu da istər-istəməz suallar doğurur:
“Bir yandan sülhdən danışan İrəvanın digər tərəfdən Azərbaycana qarşı bu cür əsassız və qərəzli sənədlərin qəbul olunmasında iştirakı bizi narahat edir. Belə bir sənədin qəbul edilməsini pisləyir və qınayıram. Əminliklə deyə bilərəm ki, Azərbaycan beynəlxalq hüquq və konvensiyalara tam əməl edib. Hazırda da yeni münaqişələrin həll olunması ilə bağlı işlək mexanizm hazırlayıb. Ermənistan-Azərbaycan arasında normallaşma prosesi həyata keçirilir. 30 ilə yaxın Azərbaycan torpaqları işğal altında saxlanıldıqda, bir milyon insanımız məcburi köçkün və qaçqın həyatı yaşadıqda Ermənistana qarşı bu cür sənədlər qəbul edilmirdi. İndi münaqişə həll olunduğu bir ərəfədə, sülhün imzalanmasına yaxın olduğumuz bir dövrdə Fransanın diktəsi ilə bu cür qətnamənin qəbul edilməsi sülhə kölgə salmaq məqsədi daşıyır. Ermənistanın da bu prosesdə iştirak etməyi iki cür izah edilə bilər. Ya Fransanın Ermənistana verdiyi siyasi-hərbi dəstəyin cavabını bu cür verirlər, ya da daxili auditoriya üçün işləyirlər. Yaxud revanşist qüvvələr bu prosesləri tətikləyirlər və Nikol Paşinyanı zəiflətmək niyyəti güdürlər. İstənilən halda bu cür qətnamələr kağız parçasından başqa bir şey deyil".
Müsahibimiz vurğulayıb ki, Azərbaycan artıq yeni reallıqlar formalaşdırıb. Onun sözlərinə görə, Azərbaycanın həyata keçirdiyi siyasət nümunəvi siyasətdir:
“Ermənilər 90-cı illərin əvvəllərində bizə qarşı soyqırım törədib, vətəndaşlarımızı qırıb, müharibə cinayətlərinin birbaşa iştirakçısı olublar. Azərbaycan Vətən müharibəsi zamanı bir nəfər dinc sakinin zərər görməsinə imkan verməyib. Ermənilərin Qarabağı könüllü tərk etməsini əks etdirən video-görüntülər var, onların müsahibələri var. Faktiki olaraq biz onların ərazilərimizi dinc şəkildə tərk etməsini təmin edə bilmişik. Bu baxımdan heç bir etnik təmizləmədən söhbət gedə bilməz. Ancaq ermənilər azərbaycanlılara qarşı dəfələrlə həqiqi soyqırımlar, qətliamlar həyata keçiriblər. Faktiki olaraq Ermənistan tərəfi Azərbaycanın ərazi bütövlüyünü tanıyıb və bunu dəfələrlə dilə gətirib. Ermənistanda fəaliyyət göstərən separatçıların fəaliyyəti də artıq İrəvan hakimiyyəti tərəfindən qəbul edilmir”.
Haqif Həmzəyev: Azərbaycanın həyata keçirdiyi siyasət nümunəvi siyasətdir
“O baxımdan düşünürəm ki, bu cür sənədlərin qəbul edilməsi bir müddət sonra dayanacaq. Çünki Makron hökuməti öz gücünü itirib, seçkilərdə ağır məğlubiyyətlə üzləşib. Nəticə etibarilə tezliklə Makron da prezidentlik mandatını itirəcək. Makronun hakimiyyətdən getməsi ilə bu cür qərəzli fəaliyyətin də müəyyən dərəcədə azalmasına şahidlik edəcəyik", - deyə Naqif Həmzəyev əlavə edib.