Gəncə və gəncəlilər hər zaman ölkə Prezidenti, Ali Baş Komandan İlham Əliyevi dəstəkləyib və ətrafında sıx birləşiblər. Bu gün Gəncə sakinləri dövlətə, Azərbaycan Ordusuna dəstək nümayiş etdirirlər.
Bunu Xəzər TV-nin proqramına onlayn qoşulan Milli Məclisin deputatı Naqif Həmzəyev bildirib. İyulun 12-də günorta saatlarından başlayaraq Ermənistan silahlı qüvvələrinin Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozmasının hər Azərbaycan vətəndaşı kimi gəncəliləri də narahat etdiyini qeyd edən millət vəkili gəncəlilərin də könüllü olaraq lazım gələrsə döyüşə getməyə hazır olduqlarını söyləyib.
“Azərbaycanın dünyanın ən güclü 50 ordusu sırasında yer alan nizami ordusu var. Şanlı Ordumuz şəhidlərimizin qisasını yerdə qoymayıb, bundan sonra da qoymayacaq. Bizim ehtiyatda olan zabitlərimiz, əsgərlərimiz, qazilərimiz var. Onlar Ali Baş Komandanın əmrini gözləyir. Mən özüm də ehtiyatda olan zabit olaraq lazım gələrsə işğal altında olan torpaqlarımızı azad etməyə hazıram”- deyə Naqif Həmzəyev vurğulayıb.
Millət vəkili Gəncə gənclərinin Ali Baş Komandana rəsmi müraciətlər etdiklərini, sosial şəbəkələrdə virtual aksiyalar keçirdiklərini də qeyd edib.