![Xocalı yenidən qurulur, dirçəlir Xocalı yenidən qurulur, dirçəlir](https://hamzayev.az/uploads/posts/2024-06/medium/1717505420_whatsapp-image-2024-02-05-at-07.00.40.jpeg)
Azərbaycan Respublikasının Prezidenti İlham Əliyev, Birinci vitse-prezident Mehriban xanım Əliyeva və qızları Arzu Əliyeva Müstəqillik Gününü Xocalı şəhərində yerli sakinlərlə birlikdə keçiriblər.
Həmin gün Xocalıdan olan bir qrup vətəndaşımıza yeni evlərinin açarları təqdim olunub, Prezident Xocalı sakinləri ilə səmimi söhbət edib. Bu, həqiqətən də dövlət başçısının böyük əməyi və əziyyəti sayəsində reallaşan bir prosesdir. 44 günlük Vətən müharibəsinin Zəfərlə yekunlaşmasından sonra mərhələli şəkildə həyata keçirilən uğurlu işlər, 2023-cü ildə bir günlük antiterror tədbirinin həyata keçirilməsi ilə dövlət suverenliyimizi tam bərpa etdik. Beləliklə, bizim tarixi torpaqlarımız separatçılardan və erməni terroristlərdən tamamilə təmizləndi. Bu gün artıq biz Xocalıya geri qayıdışı qeyd edirik.
Cənab Prezident Xocalıda mühüm açıqlamalar verdi və uzun illərdir Xocalı soyqırımı ilə əlaqədar böyük abidə-kompleksinin Bakıda tikilməməsinin səbəblərini də açıqladı. Dövlət başçısı qeyd etdi ki, mən bu torpaqlara geri qayıdacağımıza inanırdım. Ona görə məhz bu məsələ təxirə salınmışdı. Məlum olduğu kimi, Xocalı şəhidlərinin xatirəsinə ucaldılacaq Memorial Kompleksin təməli Xocalıda qoyulub.
Xocalı yenidən qurulub, dirçəlib böyük şəhərə çevriləcək. Artıq şəhər sakinlərinin üzü gülür. Xocalıda Müstəqillik Gününün qeyd edilməsinin də rəmzi mənası var. İlk dəfə idi ki, biz Müstəqillik Gününü bütöv Azərbaycanda qeyd etdik. Xüsusilə də Xocalıda elə bir bayramın keçirilməsi dünyaya və bizim torpaqlarımızı işğal etmiş, zülm yaşatmış ermənilərə mühüm mesaj idi ki, bu hadisələrdən nəticə çıxarsın. Dövlət başçısı sakinlərlə söhbətində bildirdi ki, Ermənistan həmin cinayətlərə görə üzr istəməlidir. Onu da qeyd edək ki, həmin cinayətkarların bir neçəsi hazırda Azərbaycanda həbsdədir və onların istintaqı davam edir. Ancaq bəziləri də var ki, qaçıb gizlənə bilib. İnanırıq ki, onlar da qanun qarşısında cavab verəcəklər.
Naqif HƏMZƏYEV,
millət vəkili.