![Sülh ən çox Ermənistan xalqına və cəmiyyətinə lazımdır Sülh ən çox Ermənistan xalqına və cəmiyyətinə lazımdır](https://hamzayev.az/uploads/posts/2024-05/medium/1716384276_img_20240518_192930_498.jpg)
Ermənistanda məhz delimitasiya proseslərinin həyata keçirilməsi ilə bağlı etirazlar davam edir. Bu etirazlar daha çox erməni kilsəsinə aid olan şəxslər tərəfindən və revanşistlərin dəstəyi ilə İrəvana qədər çatdı. Baş nazir Nikol Paşinyan bu etiraz dalğasının qarşısını almadı. Əksinə, onlara bu etirazları keçirmək üçün hər cür şərait yaradıldı və nəticə etibarilə də bu etirazlar elə də çox kütləni öz ətrafında toplaya bilmədi. Lakin əsas odur ki, bu etirazlarla paralel Azərbaycan və Ermənistan sərhədində delimitasiya və demarkasiya prosesi uğurla həyata keçirilir. Biz ümid edirik ki, Ermənistan ictimaiyyəti baş verən bu hadisələri qiymətləndirəcək və proses uğurla davam etdiriləcək. Nəticə etibarilə biz sülhə daha da yaxın olacağıq.
Hətta Ermənistan üçtərəfli bəyanatı imzalamaq məcburiyyətində qaldıqdan sonra ölkədə keçirilmiş növbədənkənar seçkilərdə erməni xalqı Nikol Paşinyanı dəstəkləyib. Düşünürəm ki, bu etirazlar da erməni rəsmisini qətiyyən tutduğu vəzifədən kənarlaşdırmaq üçün əsas səbəbə çevrilə bilməyəcək. Çünki erməni xalqının böyük əksəriyyəti müharibədən bezib, müharibə istəmir. Ümumiyyətlə, artıq onlar dərk edirlər ki, Azərbaycanla güc, təhdid dili ilə danışmağın heç bir mənası yoxdur.
Şübhəsiz ki, hazırda baş verən bu etirazlar da bir müddət sonra səngiyəcəkdir. Ancaq mən düşünürəm ki, qətiyyən rahatlaşmaq olmaz. Biz onsuz da dəfələrlə bəyan etmişik ki, sülh Azərbaycandan çox Ermənistana lazımdır. Sülh müqaviləsinin imzalanması ən çox Ermənistan xalqına və cəmiyyətinə fayda verə bilər. Təbii ki, biz də yalnız Azərbaycanın yox, eyni zamanda regional maraqlardan çıxış etdiyimiz üçün Cənubi Qafqazda sülhün olmasını ilk gündən dəstəkləyən əsas tərəfik. Biz bunu təkcə dəstəkləmirik, eyni zamanda sülhün baş tutması üçün Azərbaycan hökuməti tərəfindən real addımlar atılır. Ümid edirik ki, Ermənistan tərəfi də bəyan etdikləri mövqelərində və fikirlərində səmimi olacaq, sona qədər bu prosesi dəstəkləyəcək. Nəhayət, biz 2024-cü ili regionumuz üçün sülh ilinə çevirə biləcəyik.
Naqif HƏMZƏYEV,
Milli Məclisin deputatı.