“Artıq 10 ilə yaxın idi ki, Hacıqabul gölü qurumuşdu. Bu baxımdan təməli qoyulan Şirvan suvarma kanalının istifadəyə verilməsindən sonra həm bu ərazilərdəki əkin sahələrinin suvarılması təmin ediləcək, həm də Hacıqabul-Şirvan gölünün də yenidən əvvəlki görkəmini bərpa edəcək. Bununla həmin ərazidə su formalaşacaq, eyni zamanda göldə məskunlaşmış heyvanlar və bitki aləmi yenidən canlanacaq”. Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, bütün bunlarla yanaşı, uzun illərdir Azərbaycanda böyük infrastruktur layihələri həyata keçirilir: “İlk növbədə sosial-iqtisadi inkişaf proqramları çərçivəsində paytaxt və regionlar arasındakı fərqin azaldılması, həmin bölgələrdə müasir infrastruktur layihələrin reallaşdırılması, yolların, körpülərin, tunellərin, qaz və işıq xətlərinin çəkilməsi, fabrik və zavodların açılması nəticəsində məşğulluq probleminin aradan qaldırılması Azərbaycan hökumətinin əsas məqsədlərindən biri idi ki, ötən müddət ərzində bunlara nail olunub. Ümumilikdə Azərbaycanda qazlaşdırma 96% təşkil edir. Bu, həqiqətən də böyük bir rəqəmdir. Vaxt var idi ki, qaz yox idi. Meşələr qırılırdı, odunlardan yanacaq kimi istifadə edilirdi. Bu da nəticə etibarilə ətraf-mühitin çirklənməsi, meşə massivinin məhv edilməsinə gətirib çıxarırdı. Amma hazırda mövcud olan 96% qazlaşdırma vətəndaşların rahat yaşayışını təmin edən amillərdəndir. Eyni zamanda fabrik və zavodlarda, sənaye parklarında qazın olması müsbət göstəricidir”.
Deputat onu da əlavə edib ki, işıq və su infrastrukturları da yenidən qurulur: “Bir çox şəhər və kəndlərdə su kanalizasiya layihələri yekunlaşıb. Bəzi böyük şəhərlərdə isə bu layihələr hələ də davam etdirilir. Bunlardan əlavə, Azərbaycanın içməli su ehtiyatı kifayət qədər çox deyil. Bundan öncəki illərdə quraqlıq müşahidə edilirdi. Şükürlər olsun ki, cari ildə yağış və qarın yağması nəticəsində şirin su ehtiyatımız artıb. Buna baxmayaraq çalışmalıyıq ki, şirin sudan istifadə zamanı israfçılığa yol verməyək. Ermənilər bizim yalnız torpaqlarımızı işğal etməmiş, həmçinin şirin su ehtiyatımızı əllərində saxlayırdılar. Hazırda isə Azərbaycandakı şirin su ehtiyatının 25%-i Qarabağ və Şərqi Zəngəzur hesabına formalaşdırılır. Həmin ərazilərdə olan şirin su ehtiyatları ilə bağlı dövlət proqramları həyata keçirilir. Növbəti illərdə su anbarlarının, eyni zamanda suvarma kanallarının mərhələli şəkildə istifadəyə verilməsinin şahidi olacağıq. Artıq bəzi layihələr reallaşdırılıb, amma davam edən layihələr də var. Ümumilikdə çalışmalıyıq ki, bütün bu infrastruktur layihələri vətəndaşlarımızın sosial rifahının yaxşılaşdırılması və həyatlarının asanlaşdırılması ilə nəticələnsin. Biz bu günə qədər buna nail olmuşuq. Ali Baş Komandan İlham Əliyevin rəhbərliyi altında qarşımıza qoyduğumuz digər həlli vacib olan infrastruktur layihələrin reallaşmasının şahidi olacağıq”.