Qazaxıstan Prezidenti Kasım-Jomart Tokayev bu gün Azərbaycana dövlət səfərinə gəlib. Rəsmi qarşılanma mərasimindən sonra Prezident İlham Əliyevin və dövlət başçısı Kasım-Jomart Tokayevin məhdud tərkibdə görüşü olub, həmçinin prezidentlərin iştirakı ilə Azərbaycan-Qazaxıstan Ali Dövlətlərarası Şuranın birinci iclası keçirilib. Ardınca ölkə rəhbərləri Çinin Siyan terminalından Bakının Abşeron stansiyasına konteyner qatarının gəlişi mərasimini videobağlantı ilə izləyiblər. Bundan sonra prezidentlərin iştirakı ilə Azərbaycan-Qazaxıstan sənədlərinin imzalanması mərasimi olub. Azərbaycan Prezidenti İlham Əliyev və Qazaxıstan dövlət başçısı Kasım-Jomart Tokayev mətbuata bəyanatlarla çıxış ediblər.
Müqəddəs Ramazanın ilk günündə gerçəkləşən bu səfərin əhəmiyyəti, ikitərəfli müttəfiqlik əlaqələrinə, türk birliyinə təsiri ilə bağlı fikirlərini bölüşən Milli Məclisin Azərbaycan-Qazaxıstan parlamentlərarası əlaqələr üzrə işçi qrupun üzvü Naqif Həmzəyev deyib ki, hər iki ölkə arasında tarixən dostluq, qardaşlıq münasibətləri olub.
Millət vəkilinin sözlərinə görə, ulu öndər Heydər Əliyevin ikinci dəfə Azərbaycanda siyasi hakimiyyətə gəldikdən sonra bu münasibətlər daha da inkişaf etdirilib: “Son dövrlərdə Türk Dövlətlər Təşkilatı tərkibində həm Azərbaycanın, həm də Qazaxıstanın aktiv iştirakına şahidlik edirik. Azərbaycan və Qazaxıstan dövlətləri arasında da bütün sahələr üzrə inkişafı müşahidə etməkdəyik. Xüsusi olaraq, hər iki ölkənin prezidentlərinin şəxsi dostluq münasibəti bu əlaqələrin daha da inkişaf etdirilməsinə böyük bir təkan verir. Bir çox beynəlxalq təşkilatlarda Azərbaycan və Qazaxıstan demək olar ki, eyni mövqedən çıxış edirlər. Biz, Xəzər dənizinin müxtəlif sahələrində yerləşən bu iki dövlətin yük daşımalarının iştirakında, həmçinin yük daşımalarının artırılmasında yaxından iştirakını görə bilirik. Azərbaycan Qazaxıstanla bütün sahələrdə əlaqələri inkişaf etdirməkdə maraqlıdır. Bu gün Qazaxıstan Prezidenti Kasım-Jomart Tokayevin Azərbaycana səfəri zamanı Dövlətlərarası Ali Şuranın birinci iclasının keçirilməsi də münasibətlərin çox yüksək olmasından xəbər verir”.
Deputat vurğulayıb ki, İkinci Qarabağ savaşı zamanı Azərbaycanın ədalətli mövqeyini müdafiə edən dövlətlərdən bir də Qazaxıstan olub: “Qazaxıstan tərəfindən Qarabağın yenidən qurulması və dirçəlməsi prosesinə töhfə olaraq, layihələrin icrasına başlanılıb. Burada xüsusi olaraq, Uşaq Yaradıcılıq Mərkəzinin tikilməsi məhz Qazaxıstan dövlətinin maliyyə dəstəyi ilə həyata keçirilir. Bu da dövlətlər arasında münasibətlərin çox yüksək səviyyədə olmasının nümunəsidir. Qarabağda quruculuq prosesində yaxından iştirak etmək imkanı yalnız qardaş və dost ölkələrə yaradılıb. Belə dövlətdən biri də Qazaxıstandır. Bu baxımdan düşünürəm ki, məhz Ramazan ayının ilk günündə hörmətli prezident Kasım-Jomart Tokayevin Azərbaycana səfər etməsi və Prezident İlham Əliyevlə məhdud tərkibdə, Ali Dövlətlərarası Şuranın birinci iclasında geniş tərkibdə görüşlərin baş tutması çox faydalı olacaqdır. Əminəm ki, yaxın gələcəkdə münasibətlərimiz daha da inkişaf edəcəkdir”.
Millət vəkili N.Həmzəyev deyib ki, Orta Dəhlizin inkişaf etdirilməsində Qazaxıstanın çox böyük rolu ola bilər. Onun qənaətincə, Çindən Avropaya uzanacaq yük daşımalarının həcminin daha da artırılması Qazaxıstan üçün də maraqlıdır və rəsmi Astana bu yoldan daha aktiv istifadə etmək niyyətindədir: “Gələcəkdə Qazaxıstan enerji resurslarının məhz Xəzər dənizinin dibi ilə Azərbaycana, buradan isə Avropaya nəqlini reallaşdırmaq qədər bir çox ideyalar dəfələrlə səsləndirilib. Düşünürəm ki, görüşlər zamanı bu məsələlər, məqsəd və hədəflər barəsində də geniş müzakirələr aparılıb. Bununla yanaşı, Türk Dövlətlər Təşkilatının daha da gücləndirilməsi üçün sistemi şəkildə işlər görülür. Qazaxıstan da bu təşkilatın aparıcı dövlətlərindən biri hesab olunur. Bu baxımdan bütün sahələr üzrə qarşılıqlı əməkdaşlığın inkişaf etdirilməsi həm Azərbaycan, həm də Qazaxıstan üçün maraqlıdır. Qazaxıstan da Türk Dövlətlər Təşkilatının daha da güclənməsinə töhfələr verməyə davam edəcəkdir. Yaxın illərdə hərtərəfli münasibətlərin, o cümlədən logistika, iqtisadiyyat, sosial, mədəni və siyasi sahədə əlaqələrin inkişafı üçün bu gün keçirilən görüşlərin mühüm önəmi var. Şübhəsiz ki, növbəti dövrlərdə də bu cür mötəbər görüşlər keçiriləcək və xalqlarımız arasında dostluq, qardaşlıq münasibətləri zamanla daha da irəliləyəcəkdir”.